Takornariartitsinermut siunnersuisoqatigiit: Ammaassisoqaraluartoq aasaq naalereerpoq
![](/sites/default/files/styles/image_934x467/public/article_images/ilulissat.png?itok=fAwazWlu)
Takornariat angerlarsimaqqaaqqusaanerat coronavirusimulluunniit tikereernermi misissorteqqittarnissaat piumasaqaataajunnaarnera Ilulissani takornariartitsinermut siunnersuisoqatigiit nuannaarutigaat. Avataanit nunatsinnukartunut killilersuinerit Naalakkersuisut marlunngorpamit qasukkarpaat.
AAMMA ATUARUK Nunarput ammaqqilertoq: Nunatsinnut angallanneq sapaatit akunnerata tulliani tamakkiisumik ammassaaq
Aasarli taamaalereertoq takornariartitsinermut iluaqutaangaarnavianngitsoq Ilulissani takornariartitsinermut siunnersuisoqatigiit siulittaasoq Arne Niemann oqarpoq.
- Ammaqqilernera nuannaarutigigaluarlugu ulapaarfiunissaa qularaarput. Umiarsuit takornariartaatit amigaataapput taakku aningaasarsiutaanerpaat ilagisaraluarpaat, Arne Niemann oqarpoq.
Naatsorsuuteqarpianngitsut
Takornarialerisut aasaq manna sungiusimasaminnit ulapaarnikinnerunissaat taassuma ilimagaa.
AAMMA ATUARUK Ilulissani takornarialerisut peqatigiiffiat: Ajunaarnersuaqarpoq
- Kingusinaareerpoq. Soorunami sullitassaqassaagut taanna qularutissaanngilaq. Soraarnerussutisiallit ukioq kaajallallugu angalasinnaasarput taakkulu ukiaru tikerarnissaat ilimanarpoq. Inuilli maanna sulinngiffeqarrapput taakkulu Kalaallit Nunaannukarnavianngillat, Arne Niemann oqarpoq, nangipporlu:
- Pisussalli siulittoruminaapput ingammik coronaviruseqarnerata nalaani. Ammaasoqaqqilernera sapaatit akunneri pingasut matuma siorna paasisimasuugutsigu iliuuseqarsimasinnaagaluarpugut. Piffissamimi tassani inuit sulinngiffeqarnissartik pilersaalertarpaat, maanngarnissaminnullu inniminniisimasinnaagaluarlutik.
Naak Visit Greenland staycationimik, tassa nunatsinni sulinngiffeqarnermi angalanissamut pilerisaarillutik, nittarsaassinikuugaluartut nunatsinni najugallit sulinngiffeqarnerminni Ilulissanut angalanersut malunnarsimanngilaq.
- Ikiorsiissutit tamaasa nuannaarutigaavut kisianni iluaqutaarpianngillat. Takornariat nunap sinneranit Ilulissiartut soorunami nuannaarutigigaluarpugut kisianni maanna killiffitsinnut iluaqutaangaanngillat, Arne Niemann oqarpoq.
Tasiilami akunnittarfik The Red House coronavirusip ajornartoortitsineranit aamma eqqugaavoq. Nunatta ammaqqilernera akunnittarfiup piginnittua Robert Peronip naatsorsuuteqarfigivallaanngilaa.
- Sisamanik tallimanilluunniit unnuisussaqarpugut. Tikittussat 90-95 procentiisa missaat annaanikuuagut, Robert Peroni oqarpoq.
Takornariat augustimi takkutissasut
Angallannermut killilersuutit qasukkarneqarneranit Innovation South Greenlandimi nuannaarutigineqarput.
Nunatsinnut angalasut killilersuiffiginerisa qasukkarnerat Naalakkersuisut sisamanngormat avammut nalunaarutigereeraallu kujataani takornarialerivimmi pisortaq Sarah Woodall nunatsinnut takornariarumasunit saaffigineqallattaavoq.
- Saaffiginnittut amerlanersaat augustip qaammataani angalarusupput. Siulliit augustip aallartilaarnerani. Aajunaralaarsuaq, Sarah Woodall oqarpoq.
Inuilli qanoq amerlatigisut saaffiginnissimanersut oqaatigerusunngilaa.
AAMMA ATUARUK Turisme i Tasiilaq og omegn er hårdt coronaramt
Ammaaqqinnerli takornarialerisunut inuussutissarsiutilinnillu suliassaqaqqilersitsilernera Sarah Woodallip nuannaarutigaa. Staycationimik nittarsaassinermit Kalaallit Nunaat qimannagu sulinngiffeqarnerminnut atatillugu angalasorpassuaqartoq Innovation South Greenlandimi maluginiarsimavaat.
- Inuit nittartakkatigut naapittarfiini takusinnaasagut aallaavigalugit nuna qimannagu angalasorpassuupput.