Ilulissani takornarialerisut peqatigiiffiat: Ajunaarnersuaqarpoq
![](/sites/default/files/styles/image_934x467/public/article_images/ilulissat.png?itok=fAwazWlu)
Nunatsinni takornarianit ornigarneqarluarnerpaasoq, Ilulissat, coronavirusip ajornartorsiortsitsineranit eqqugaarujussuarpoq.
- Inoqanngilagut, Ilulissani takornarialerisut peqatigiiffiani Greenland Connectorsimi siulittaasoq, Aakattak Sandgreen, oqarpoq.
Timmisartukkut angallanneq marsip 20-anni unitsinneqaraluarpoq, maannali ammaassisoqaqqinnikuuvoq.
Nunatsinnulli angalaqqusinnginneq maajip ulluisa 31-ata tungaanut atuukkaluartoq juunip ulluisa 15-iannut sivitsorneqarpoq.
- Inuussuterput tammaveqqavoq
- Inuussuterput takornarialerineq tammaveqqalluni tammaveqqavoq massakkut. Sanaluttartut, nunami angallassisartut, kaffisoriartitsisartut, oqaluffiliartitsisartut, minnerunngitsumillu neriniartarfippassuit akunnittarfiillu tamarmik ajutoorput, Aakattak Sandgreen oqarpoq.
- Nunarsuarmi ajutoornersuaqarpoq. Ajunaarnersuartut oqaatigineqarsinnaavoq.
Naalakkersuisut nunatsinni inuussutissarsiutinut ikiorsiissuteqarput.
Takornariaqarnermi akunnittarfiuteqarnermilu suliffiit 50 millioner koruuninik ilaatigut aningaasaliiffigineqarlutik.
Aakattak Sandgreen naapertorlugu ikiorsiissutit suliffeqarfinnut minnerusunut iluaqutaapput.
- Mikinerusunut iluatitsisunut iluartorujussuuvoq. Kisianni anginerusunut iluaqutaanngilaq. Ilikkarnikut iluaqutigivaat, kisianni uku ilikkarnikuunngitsut tunniutiinnartut arlaqartut nalunngilakka, Aakattak Sandgreen oqarpoq.
Nunatsinni naatsorsueqqissaartarfiup paasissutissaatai naapertorlugit Ilulissani ukiup siulianut sanilliullugu unnuisut 32 procentimik maanna ikinnerupput. Takornariat ullormiit ullormut tikissinnaajunnaarnermata immikkut saaffiginniffissamik pilersitsisoqarnissaa nunaqavissut takornarialerisut naatsorsuutigisimagaluarpaat, taamali pisoqanngissoraat.
- Isumaqaraluarpugut immikkut ittumik maani krisecentereqassagaluarluta. Nalornisorpassuupput, ikiorniarsaraagut arlallit, kisianni uagut bankiminni kontoat alakkarasinnaangilarput, sorpassuit nalunaqaaq. Taamaattumik professionalinik maaniittoqartariaqaraluarami.
Siunnersoqatigiit isumaqataasut
Ilulissani takornariartitsinermut siunnersuisoqatigiit siulittaasuata Arne Niemannip tamanna isumaqatigaa.
Naalakkersuisunit paasineqarnani taanna misigisimavoq - tusagassiutit aqqutigalugit isumaminik assigiinngitsunik Naalakkersuisunut oqariartuuteqartarpoq, tusaaneqartutulli misiginngilaq.
AAMMA ATUARUK Ilulissaniit politikerinut kissaat: Nunarput takornarianut ammaqqissiuk
- Soorlu tusilartumut suaartarluni,
Arne Niemann oqarpoq. Taanna ukiuni 40-uni namminersortuuvoq.
- Namminersorlutik Oqartussat ikiuunnerusariaqarpoq. Tamanna qularutissaanngilaq. Isumaqarpunga paasinninnermik takutitsivallaanngitsut. Erseqqissaatigissavara nunap matunissaa oqartussat namminersorlutik piumasarinikuuat. Uaguunngitsoq, takornarialerisut. Taamaammat ikiuunnissaat pissusissamisooraluarpoq. Arne Neimann oqarpoq.
Tapersersorneqanngitsutulli misigineq unittoorfiginngikkitsik, Aakattak Sandgreen oqarpoq.
- Neriunneq, immaqa kisiartaalluni massakkut qamuuna ikiorpaatigut.