Ilulissaniit politikerinut kissaat: Nunarput takornarianut ammaqqissiuk
Ilulissani takornariartitsisut akornanni pakatsinerujartuinnartoqarpoq.
Aningaasat annaasat, takornariallu nunatsinnut qaqugu angalasinnaanngoqqinnissaasa nalornissutigineqarnera illoqarfiup takornariartitsinermut siunnersuisoqatigiivinut aarlerititsipput.
Siunnersuisoqatigiit siulittaasuat Arne Niemann taama nassuiaavoq. Taassuma aarlerissutigaa takornarialerisut Naalakkersuisuniit ikiorserneqanngikkunik matusariaqalissasut.
- Matusariaqalertoqarsinnaavoq, Arne Niemann maanna inissisimaffik pillugu oqarpoq.
AAMMA ATUARUK Borgmesterip Vittus Qujaukitsoq akivaa: Aningaasanik piumasaqanngilagut
Naalakkersuisut siunnersuutinik aningaasartuutaasorujussuusussanik pisariaqavissunngitsunillu ukiup sinnerani tiguserusunnani aningaasaqarnermut naalakkersuisoq, Vittus Qujaukitsoq (NQ),ammasumik sapaatit akunnera una aallartilaartoq allappoq. Arne Niemannillu takornarialerisunut ikiorsiinissaq maannakkut pisariaqavissortuusoq oqaatigaa.
- Maannakkut ammaasoqassanngippat suliffeqarfittut aniguisinnaanavianngilagut, innuttaasutullu allatuulli isigisariaqarpaatigut. Uagut pisunut pisuunngilagut. Ammaqqusaanngitsugut takornariaqaqqusaanngitsorlu Namminersorlutik Oqartussat aalajangiussaraat, Niemann oqarpoq.
Ikiorsiissutinik pisariaqartitsineruneq
Takornariartitseqatigiiffiit ikiorsiissutinik qinnuteqarsinnaatitaapput, taakkuli takornariartitseqatigiiffinnut naammanngitsut siulittaasoq isumaqarpoq.
Nammineerluni suliffeqarfiutaa IceCap Tours ikiorsiissutinik qinnuteqarsimavoq, annaasaminullu taarsiullugit qaammammut 23.000 koruuninik ikiorserneqarpoq.
Politikerilli Arne Niemannituulli kaaviaartitanit 2,5 millionit koruuninik coronap kingunerisaanik maannamut annaasaqarsimasunut tapiinerusariaqartut, Arne Niemann isumaqarpoq.
- Tapiissutitik annertusisariaqarpaat, taanna oqarpoq.
Ikiorsiissutinut aningaasaliussanit katillugit 257 milliuunit koruuniupput. 14 millionit koruuniinnaalli apriilip naanerani tunniunneqareerput, suliffeqarfinnullu ikiorsiissutit tunniunneqareertut 1,5 millionit
AAMMA ATUARUK Vittus Qujaukitsoq kommunet siunnersuutaat pillugit: Qanoq aningaasalersorneqassappat?
Arne Niemann naapertorlugu aningaasat ikiorsiissutitut tunniunneqareertut takornariartitseqatigiiffinnut ikiorsiinerunissamut tunngavissaalluarput. Takornariartitseqatigiiffiit siorna akileraartititik nalinginik tunineqarnissaat Arne Niemannip ikiuinerunissamut siunnersuutigaa.
- Ingerlatseqatigiiffissuimmi avataaneersut assiginagit tamaani tunngavilinnik tamaanilu akileraartartunik ingerlatseqatigiiffeqarnissaq pilerinarpoq, Arne Niemann oqarpoq.
Najukkami takornariartitsisoqartarunnaarsinnaasoq
Angalanermut killilersuinerit maannakkut atuuttut maajip naanissaanut atuupput, takornariallu nunatsinnut juunip aallaqqaataaniit angalasinnaanngussanersut suli nalunarpoq.
Arne Niemann naapertorlugu takornarianut juunip aallaqqaataa aallarnerfigalugu ammaassisoqarssanngippat ajortorujuussaaq. Killilersuinerlu sivitsorneqassappata qanoq pisoqarumaarnersoq takorlooruminaatsippaa.
- Taava ingerlatseqatigiiffiit annerit ajornartorsiornermit aniguinissamut tunngaveqarluartut kiserngorussapput. Taava najukkami takornariartitsisoqartarunnaarnissaa qularinngilluinnarpara, Arne Niemann oqarpoq.
