Borgmesterip Vittus Qujaukitsoq akivaa: Aningaasanik piumasaqanngilagut
![Palle Jerimiassen](/sites/default/files/styles/image_934x467/public/article_images/img_0425.jpg?itok=Vy8x0fB2)
Aningaasaqarnermut Naalakkersuisup, Vittus Qujaukitsup (NQ), kommuniniit siunnersuutit qatsuppai. Ingammik tamakku anigaasalersornissaannut siunnesuutitaqanmngikkaangata.
Borgmesterit tallimat ikiaroornartumik eqqussuisunik amerlanernik tigusarinnissinnaajumalluni amerlanerusunik ilanngaaserisoqalerrnisaanik kingullertigut siunnersuuteqarput.
AAMMA ATUARUK Vittus Qujaukitsoq kommunet siunnersuutaat pillugit: Qanoq aningaasalersorneqassappat?
Sulinngiffeqarnermi akitsuuteqanngitsunik angalanissamut siunnersuut kingorna takkuppoq, taavalu takornarialerisunut ikiorsiissuteqalernissamut siunnersuut.
Taakku Vittus Qujaukitsoq malillugu aningaasartorfiualklaassapput. Avannaata Kommunianili borgmesteri, Palle Jeremiassen (Siumut), isumaqataanngilaq.
Ikiorsiissutitut illikartitat suli sinneqartut
Vittus Qujaukitsoq ikiorsiissutitut aningaasaliissutit nassaarfigisinnaagamigit ujarlertariaqanngitsoq, Palle Jeremiassen isumaqarpoq.
Suliffeqarfinnut ikiorsiissutit Naalakkersuisut illikartitaat katillugit 257 millionit koruuniupput.
Ikiorsiissutinik suliffeqarfinnut apriilip naanerani 14 millionit koruunit tunniunneqarsimapput. Tassa 257 millionit koruuniniit 14 millionit koruunit.
Aqqa Samuelsenip Inuit Ataqatigiinneersup paragraf 37 atorlugu apeqqutaanut suliffeqarnermut naalakkersuisup, Jess Svanep (S) akissutaani taamak allaqqavoq.
Aningaasat sulissapput
Taamaattumik aningaasat ikiorsiissutiniittut takornarialerisunut tunniukkaanni sunniuteqrnerussasut, kommunit isumaaqarput.
- Vittus Qujaukitsup kommuninut akissuteqaataa isumaqatigiuminaatsippara. Aningaasanik ikiorsiissutinik annertunerusunik qinnuteqanngilagut. Isumaqarpugulli ikiorsiisutitut illikartitat pisariaqartitsivissortunut, tassalu takornarialerisunut tuttariaqartut, Palle Jeremiassen oqarpoq.
Palle Jeremiassen isumaqarpoq ikiorsiissutinik qinnuteqarnissaq ajornarpallaartoq. Taamaammallu Greenland Business, qinnuteqaatinik suliarinnittuusoq Avannaata Kommunianut tikilluni qinnuteqartussat qanimut ikiorlugillu aqqutissiuukkiartortariaqarai, Palle Jeremiassen isumaqarpoq.
- Greenland Business Nuummiiginnarani ikiortariallit aamma allat tikissagaluarpai. Ikiorsiissutinik qinnuteqaasiornissaq ilikkarneqassagaluarpoq, Palle Jeremiassen oqarpoq.
- Aningaasat ikiorsiissutitut illikartitat suliffeqarfinnut anngutinngikkunik sumut atussagamik? Palle Jeremiassen oqarpoq.