Vittus Qujaukitsoq kommunet siunnersuutaat pillugit: Qanoq aningaasalersorneqassappat?

Avannaata Kommuniata borgmesteria, Palle Jeremiassen (Siumut), coronaqarnerup kingorna ammaqqilernermi iliuusissatut pilersaarummik ujartuivoq. 

Taanna takornariaqarnerpaaffimmi, Ilulissani, borgmesteriuvoq, takornarianillu tikeraartunillu allanik takorusulluni.

Kisimiinngilarli. Nunatsinni borgemsterit tallimat coronaqarnerani takornariartoqarneruleqqullugu takornarialerisunut ikiorsiissuteqarnissamik Naalakkeruisunut siunnersuuteqarput. 

Tamannali naammaleqaaq. Aningaasaqarnermut Naalakkersuisoq, Vittus Qujaukitsoq (NQ), Naalakkersuisut nittartagaatigut ammasumik allakkiorluni taamak allappoq.

Takornariat akileraarutitaqanngitsumillu angalanerit

Aningaasammi suminngaanniissagamik, Vittus Qujaukitsoq aperivoq:

- Siunnersuutit qimerloorusuppakka, aningaasalersornissaannuli qanoq eqqarsarpisi? 

Naalakkersuisut suliffeqarfinnut 257 mio.kr.-nik nalilinnik ikiorsiissuteqareerput. Taamaammat kommunit aningaasartalinnik siunnersuusiortillutik aningaasat suminngaanniissanersut ilanngullugu siunnersuusiortaqqullugit, Vittus Qujaukitsoq kaammattuivoq. 

Takornarialersisunut ikiorsiissutit saniatigut akitsuuteqanngitsumik angalaneq kommunet tallimat siunnersuutigaat.

- Siunnersuutit siuliani taaneqartut borgmesterinit tallimaneersuupput, ilaatigullu aningaasartuuteqarfiunissaat siunnersuutit assigiissutigaat. Ilaatigut aamma siunnersuutit qanoq aningaasalersorneqarumaarnissaannut siunnersuummik ilanngussisoqanngilaq.

Nunatta aningaasaqarnera ajalusooqqajaasoq

Siunnersuutitsialannut ammalluni tikkuartorpaa, nunattali aningaasaqarnerata coronaqarnerup nalaani ajalusooqqajaanerani ingerlariaqqinnissaq sapernartartoq aamma tikkuarlugu.

- Suut qanoq pitsaanerusumik ingerlanneqarsinnaanerannut isummat nutaat sukkulluunniit saqqummiunneqarnissaat tikilluaqqusarpavut, siunnersuutilli nutaat aningaasartuuteqarfiusussat qanoq aningaasalersorneqarnissaannut siunnersuummik ilaqartinneqanngikkangasa maanna Coronap nalliusimaarnerani siunnersuutitsialappassuarnut siunertagissaartunut aningaasanik nassaarniarneq ajornakusoortorujussuuvoq, Vittus Qujukitsoqoqarpoq.

Naalakkersuisut coronaqarnerup nalaani sanaartornerit arlallit kinguartinnguikkunikkit taamaatiinnarnikuuaat. Vittus Qujaukitsoq siunnersuutinut sumiifinni suliffissaaleqiffiusuni pisarialiinnarmik suliassaqartitsisinnasunut tamaallaat tusarnaarusuppoq. 

 Vittus Qujaukitsup oqaaseqartinnissaa iluatsinngilaq.