Nunarput ammaqqilertoq: Nunatsinnut angallanneq sapaatit akunnerata tulliani tamakkiisumik ammassaaq
Nunatta ammaqqikkiartuaarnerata immikkoortuata pingajuat marlunngorpat atuutilissaaq.
Tassa imaappoq, nunatsinnut sapaatit akunnerannut tikittartut killilersorneqarunnaarput. Nunatsinnut tikittut sapaatit akunnerannut amerlanerpaamik 600-usarnissaat juunip ulluisa 15-ianili piumasaqaataavoq.
Nunatsinnullu tikittut tikinnerminniit ulluni tallimani angerlarsimaannarnissaat piumasaqaataajunnaarpoq.
AAMMA ATUARUK Naalakkersuisut nunatta ammaqqikkiartuaarnerata immikkoortua siulleq juulip 20-anut sivitsoraat
Nuuk
Paamiut
Sisimiut
Maniitsoq
Qaqortoq
Narsaq
Aasiaat
Qasigiannguit
Qeqertersuaq
Ilulissat
Kangerlussuaq
NarsasuaqNunatsinnullu tikinnermiit ullut tallimat qaangiunneranni misissorteqqinnissaq aamma piumasaqaataajunnaarluni - paasissutissat boksimiittut takukkit.
Piumasaqaatilli taakku illoqarfiit nunaqarfiillu ilaannut atuutinngillat.
Illoqarfiit nunaqarfiillu ilaat napparsimmavinnut ungasipput.
Soorlu Upernavik assersuutissaqqittoq, Kim Kielsen oqarpoq. Upernavimmukannginnermimi ulluni tallimani Ilulissaneeqqaarnissaq piumasaqaataavoq - Ilulissanilu coronavirusimut misissortinnermi tunillatsissimannginneq aatsaat uppernarsarneqareerpat Upernavimmut ingerlaqqittoqarsinnaalluni.
Nunatsinnukartussanut piumasaqaatit taamaaginnartut
Nunatsinni piumasaqaatit allanngortinneqangaatsiaraluartut, Danmarkimiit nunatsinnukartussanut piumsaqaatit allanngortinneqanngillat.
Taakku nunatsinnukannginnerminni coronavirusimut misissortillutillu immersugassaq-Sumut immersussavaat.
Taamaammat nunatsinnukannginnermi coronavirusimik tunillatsissimannginermut immersugassamillu Sumut-mik immersuisimanermut uppernarsaateqarnissamut piumasaqaatit suli atuupput.
Nunattali ammaqqikkiartuaarnerata immikkoortuata aappaa taamaatilluguu immikkoortuata siullianiit pingajuanik atuutilersitsinermut suna peqqutaava?
- Immikkoortut taakku pingasut siunnersuutaannaapput. Nunatsinnilu maannakkorpiaq tunillatsissimasoqarani, Naalakkersuisut siulittaasuat Kim Kielsen (S) oqarpoq.
- Islandimi Savalimmiunilu aamma tunillaassuuttoqarpiaavingilaq. Oqareernittut misissorteqqeqqaarani angallannermut piumasaqaatit illoqarfiit nunaqarfiillu ilaannut atuutinngillat.
Illut iluani katerinnermi inuit amerlanerpaamik 100-nissaannut - silamilu amerlanerpaamik 250-nissaannut piumasaqaatit suli atuupput.
- Piumasaqaatillu taakkua EQQUUTITINNEQASSAPPUT, politimesteri Bjørn Tegner Bay oqarpoq.
Nunatsinni inuit 13-it tunillatsinnikuusimasut
Nunatsinni inuit coronavirusimut misissortinnikut 5164-iupput. Taakkunannga 13-it tunillatsinnikuusimallutik – taakkualu tamarmik peqqisseqqittutut qangalili nalunaarutigineqareerput. Taakkunannga arlaannaalluunniit napparsimmavimmi uninnganikuunngilaq.
Naalakkersuisulli nunatsinnut tikittut amerlassusaannik killilersuiunnaarnerat aammalu angerlarsimaannarnissamik tikinnermiillu ullut tallimat qaangiunneranni misissorteqqinnissamik piumasaqaateqarunnaarnerat nunatsinni tunillatsissimasoqaqqilerneranik kinguneqarumaartoq ilimanarpoq.
- Immikkoortumut nutaamut appakaappugut, maannalu ingerlaqqissinnaanngorpugut. Taamaammat Naalakkersuisut nunatta ammaqqikkiartuaarnerata immikkoortuata aappaanik aallartitseqqinnissaat innersuussutigaarput, nunatta nakorsaanera Henrik L. Hansen oqarpoq.
AAMMA ATUARUK Coronamut atatillugu killilersuinerit sivitsorneqartut
Toqqusaakkut tigusanik misissuinermut atortut Københavnimiit Aasiannut, Sisimiunut Ilulissanullu ullumikkut tikissapput.
Taakku ilaat Tasiilamut Qaqortumullu aamma tikingajalersut, nunatta nakorsaanera oqarpoq.
- Taakku nappaat Covid-19 tunillaassuuteqqilissappat siaruatsaalinissaanut pingaaruteqaqaat, Henrik L. Hansen oqarpoq.
Nunanili allaniit nunatsinnukarneq suli inerteqqutaavoq. Nunat pineqartut uani takusinnaavtit.