Coronamut atatillugu killilersuinerit sivitsorneqartut
Coronavirusip nunatsinni tunillaassuutilinnginnissaa pillugu killilersuinerit atuunnerat juunip ulluisa 15-ianut sivitsorneqarput.
Namminersorlutik Oqartussat taama nalunaaruteqarput.
Assartuutinut, inuussutissarsiummik ingerlataqartunut, pisortat suliffeqarfiutaannut killilersuigallarnerit inerteqquteqartitsinerillu apriilip naanerani atuutsinneqaleramik maajip naanissaanut atuussasut inatsisip oqaasertaani allaqqavoq.
Namminersorlutik Oqartussalli killilersuinermut nalunaarutip atuunnera juunip ulluisa 15-iannut sivitsoraat, tusagassiuutinut nalunaarummi allaqqavoq.
Tassalu qatserisartoqarfinni oqartussat ininut, soorlu imerniartarfinnut, isersinnaasutut akuerisimasaasa amerlassusaasa 50-procentiitut amerlatigisuinnaat suli isersinnaassapput.
Inuit imminnut suli qanillinaveersaaqquneqarput, Nunatta Nakorsaaneqarfianiillu eqqiluisaarnissamut silatusaartumillu pissuseqarnissamut malittarisassat maleqquneqarlutik.
Naalakkersuisut nalunaarutaat nittartagaanni atuarneqarsinnaapput.