Naalakkersuisut nunatta ammaqqikkiartuaarnerata immikkoortua siulleq juulip 20-anut sivitsoraat
Danmarkimi killeqarfinnik ammaaqqikkiartuaarnermi alloriaqqittoqaraluartoq, Naalakkersuisut inuit sapaatit akunnerannut 600 missaannaat timmisartorlutik nunatsinnukarsinnaanerannik attassinissaq aalajangiusimavaat.
Nunattami ammaqqikkiartuaarnerata immikkoortuata siullia juulip ulluisa arferngata tungaanut atuuttussaagaluaq juulip ulluisa 20-annut sivitsorneqartoq, Naalakkersuisut siulittaasua tusagassiortunik sisamanngornermi ualikkut aggersaanermi oqarpoq.
- Savalimmiut Danmarkilu avammut ammaqqikkiartuaarnerisa ilutigisaannik taakkunani coronaviruseqarnerani pissutsit malinnaavigeqqissaarpavut, taakkunanilu tunillatsissimasut amerleqqerataannaammata pissutsit malinnaavigeqqissaaqqaarusuppagut, Kim Kielsen tusagassiortunik aggersaanermi oqarpoq.
Partiit siuttui tamarmik nunatta ammaqqikkiartuaarnerata immikkoortuata siullianik sivitsuinissamik ullorornerani ataatsimiinnerminni akuersipput.
AAMMA ATUARUK Nunatsinniit nunatsinnullu angallanneq: Qanermut assiaqut, immersugassaq-Sumut misissortinnerlu
Danmarkimiit timmisartorluni nunatsinnukannginnermi Sumut-immersugassamik pinngitsoorani immersuisimanissaq coronavirusimillu tunillatsissimannginnermut uppernarsaateqarnissaq pisariaqartoq, naalakkersuisut siulittaasuata erseqqissaatigeqqippaa.
Angalaneq nammineq akisussaaffigineqassasoq
Danmarkimi Europap avataani nunanut arfinilinnut killeqarfiit arfinillit ammaqqittut, danskit nunanut allanut tunngasunut ministereqarfiata ullumikkut sisamanngornermi nalunaarutigaa. Tamanna assersuutigalugu Canadamut, Australiamut Thailandimulluunniit aallaqqittoqarsinnaaneranik kinguneqaraluartoq, angalaneq nammineq akisussaaffigineqassasoq, Kim Kielsen erseqqissaavoq.
- Sumukarnissarsi nammineq akisussaaffigissavarsi, nunamili allamiinnissinni tunillatsissagaluarussi nunatsinnut angerlarlusi angalanersi nammineq akilissavarsi. Taamaammat tunillatseratarsinnaanersi eqqarsaatigalugu ilumut angalassanersusi isumaliutigeqqissaartariaqarparsi, Kim Kielsen oqarpoq.
Danmarkimiit timmisartorlutik Kangerlussuarmukartunit coronavirusimik tunillatseratarsinnaaneq sivisuumik aarleqqutigineqarpoq, oqartussalli isumaqarput tamanna ernummatigineqartariaqanngitsoq.
- Inuppassuarnik timmisartoqateqarnerat sivikeqimmat tunillatsissimanissaat ilimanaateqanngitsoq nakorsaanerup nalileraa, Kim Kielsen oqarpoq.
Nunatsinni coronavirusimut misissortereernikut katillutik 3840-pput, Ilulissani ataaseq tunillatsissimasoq maajip ulluisa 27-anni paasineqarmalli tunillatsissimasunik nutaanik maannut nalaatsisoqaqqinngilaq.
