Nunatsinniit nunatsinnullu angallanneq: Qanermut assiaqut, immersugassaq-Sumut misissortinnerlu
![](/sites/default/files/styles/image_934x467/public/article_images/airbus_norsaq_simonuldum.jpg?itok=KtSVdalS)
Aasaanerani angalanerit qanilliartorput, nunatsinniillu angalanissamut pilersaaruteqaraanni coronavirusimut tunngatillugu malittarisassat najoqqutassallu apeqqutissarpassuaqalersitsipput.
Immikkut maluginiagassat ilaat uani atuarsinnaavatit.
Nunatsinnit Danmarkimut timmisartukkut angalaneq
Nunatta ammaqqikkiartuaarneranut immikkoortoq siulleq ippassaq aallartippoq. Taamaammat amerlanerpaamik 600-it nunatsinnut sapaatip-akunneranut tikissinnaalerput. Nunatsinnit aallarsinnaaneq sapaatit-akunneri qassiusut matuma siorna ammaateqqinneqarput - taakkulu ammaannassapput.
Danmarkimilu ippassaq aamma allanngortoqarpoq. Tassa Tysklandimit, Norgemit Islandimiillu tikittoqarsinnaalerpoq. Taamammallu Københavnip Mittarfiani qanermut assiaquteqarnissaq piumasaqaataavoq.
Taamaammat Namminersorlutik Oqartussat pigisaata, Air Greenlandip Kangerlussuarmiit Københavnip mittarfianut ingerlaalinnginnermi qanermut assiaqutersereertoqarnissaa innersuussutigaa.
Københavnip Mittarfia naapertorlugu qanermut assiaqut nakorsat atortagaat atorneqassaaq. Aammattaaq qanermut assiaqutip akunnerit pingasut sisamallu ingerlanerani taarserneqartarnissaa innersuussutigineqarpoq.
Qanermut assiaqut 9 koruuneqartoq
Qanermut assiaqutit Kangerlussuup mittarfiani Pilersuisup pisiniarfiini pisiarineqarsinnaapput, taakkulu 9 koruuneqarlutik. Pilersuisoq mittarfimmi akitsuusersugaanngitsunik pisiniarfeqarpoq, mittarfiullu avataani aamma pisiniarfeqarluni.
Kangerlussuarmi qanermut assiaqutit 7.500-it maanna tunisassatut piareersimasut, Pilersuisup pisortaata, Brian Weuge Chemnitzip nassuiaatigaa.
- Taamaammat nunatsinni tamarmi tuniluuttoqalissagaluarpat mittarfinni allani neqerooruteqarnissatsinnut piareersimavugut, pisortaq oqarpoq.
Qanermut assiaqutit peqqinnissamut oqartussanik akuerisaapput, allanillu aamma tikittoqassaaq.
Kangerlussuarmi qanermut assiaqutersinissaq angumerinngikkaanni Københavnip mittarfiani isumannaallisaalluni nakkutilliiviup tikinnginnerani terminal 2-p 3-llu akornanni pisiniarfimmi ammajuaannartumi, 7-elevenimi qanermut assiaqutersisoqarsinnaavoq.
Sumut angalasoqassava?
Danmarkimut tikilluni nunanut allanut ingerlaqqinnissamut pilersaaruteqaraanni danskit nunanut allanut tunngasunut ministereqarfianit assigiinngitsunik innersuussutissaqarpoq.
Nunanut allanut pisariaqanngitsumik angalaniartut suli innersuussutigineqanngillat. Taakkuli nunanut Islandimut, Norgemut Tysklandimullu atuutinngillat.
Innersuussutit malinnianngikkaanni qassiiusunik maluginiagassaqarpoq. Assersuutigalugu nunat pinngitsaaliissummik mattussinissamik killeqarfinnilluunniit matusinernik kinguneqartunik nutaanik killilersuisinnaapput.
Aammattaaq Nunanut allanut tunngasunut ministereqarfiup nittartagaani 'Danskit allattorsimaffiannut' allatsittoqassaaq. Taanna Nunanut allanut tunngasunut ministereqarfiup danskinut innuttaassuseqartunik kunngeqarfiup avataaniittunik allattugaateqartitsisarpoq.
Nunanut allanut tunngasunut ministereqarfiup nunanut angalaqqusinngiffiinut angalasimalluni Danmarkimut tikinnermi ulluni 14-ini angerlarsimaannartoqarnissaa kaammattuutaavoq.
Nunanut allanut tunngasunut ministereqarfiup nittartaatigut annerusumik atuagaqarit
Danmarkimit nunatsinnut
Naalakkersuisut nakorsaaneqarfiullu oqarnerat naapertorlugu nunatsinnut angalaniartup aallannginnerani amerlanerpaamik ullut tallimat sioqqullugit covid-19-imut misissortinnermi napparsimanngitsutut uppernarsarneqarsimassaaq. Taamaammat Danmarkimi misissortinnissaq nammineq isumagineqassaaq.
Nunatsinni najugaqaraanni
Tamanna Naalagaaffiup napparsimmavianut attaveqarnikkut pisarpoq.
Siullermilli:
Nunatsinni najugaqaraanni immersugassamik-Sumumik immersuisimanissaq pingaaruteqarpoq. Immersugassaq pingaaruteqarpoq, taannami Naalagaaffiup napparsimmavianut saaffiginninnermi atorneqassaaq.
Taanna immersoreeraanni nakorsaaneqarfiup oqarnera naapertorlugu immersugaq Naalagaaffiup napparsimmavianut mailikkut nassiunneqassaq.
Naalagaaffiup napparsimmaviata mailia: corona.rigshospitalet@regionh.dk
Mailimi uku nassiutissavatit:
- Immersugassap-Sumup immersorsimaneranut uppernarsaat
- Ateq
- CPR/Inuup normua
- Oqarasuaatip normua Danmarkimi atorsinnaasoq
- Mailimut adresseq ulluinnarni atortakkat
- Aallarnissamullu ulloq, tassa Danmarkimit nunatsinnut angalanissavit ullua
Naalagaaffiup napparsimmavianut mail nassiutereerukku akissutersinissat utaqqissavat. Naalagaaffiup napparsimmaviata piffissamik misissortinnissallu sumiiffissaa pillugu attavigissavaatit.
Danmarkimi najugaqaraanni
Danmarkimili aalajangersimasumik najugaqaraanni periarfissat allaanerulaarput:
Covid-19-imut misissortinnissamut piffissamik nittartakkami uani inniminniisoqarsinnaavoq: coronaprover.dk. Taanna Nem-ID atorlugu iserfigineqarsinnaavoq. Nem-ID-eqanngikkaanni Danmarkimi nunap immikkoortuini napparsimmaviit ilaannut sianertoqarsinnaavoq.
Danmarkimi nunap immikkoortuini napparsimmaviit oqarasuaataasa allattorsimaffiat uani takuuk.
Misissortinnermuut akissutisinissaq nakorsaaneqarfik naapertorlugu ullunik pingasunik sivisussuseqarsinnaavoq.
Tunillanneqarsimanngitsutit misissortinninni uppernarsarneqarpat nunatsinnukarsinnaalissaatit. Eqqaamajuk qanermut assiaqutilisassagavit.
Tunillanneqarsimanngitsutut misissortinninni uppernarsaatit Air Greenlandip nassatanik tunniussisarfianukaruit takutissavat. Uppernarsaatit amerlanerpaamik ullunik tallimanik pisoqaassuseqassaaq.
Tamatuma saniatigut immersugassaq-Sumut immersussavat.
Immersugassami ilisimatitsissutigisassatit ilaatigut makkuupput: Angalanissamut pilersaarut, najugaq, sumiiffik attaviginissannut paasissutissat.
Tunillanneqarsimannginnermut uppernarsaatilisarnak imaluunniit Sumumik immersugalisarnak nassatanik tunniussisarfiliaruit aallarsinnaanngilatit. Tamatumunnga atatillugu ullormi allami aallartussanngortinneqassaatit, akunninnerilli nammineq akilissagit, nakorsaaneqarfik allappoq.
Nunatsinnut tikikkaanni
Nunatsinnut tikikkuit toqqaannartumik angerlarsimaannaqqusaalissaatit.
Angerlarsimaannaqqusaaninni sapinngisamik angerlarsimaannarnissat nakorsaaneqarfiup siunnersuutigaa. Anisivinnaavutit, inunnulli allanut sapinngisamik attaveqassanngilatit.
Angerlarsimaffinni najugaqateqaruit qanillattorsimanngikkussi eqqiluisaarussilu taakku angerlarsimaannaqqusaanavianngillat.
Nunatsinnut tikinninniit ullut tallimat qaangiuppata misissorteqqinnissannut piffissamik inniminniissaatit. Najukkanni peqqissaavimmut sianerlutit taamaaliussaatit.
Tunillanneqarsimanngitsutit misissortinninninni uppernarsineqarsimappat angerlarsimaannaqqusaanerit atuukkunnaassaaq. Taava piumallerlutillu anisinnaalissaatit.
Tunillanneqarsimasutilli misissortinninni uppernarsineqarpat nakorsaaneqarfiup attavigissavaatit.
Angerlarsimaannaqqusaanerit tamatuma kingorna nangissaaq, allanilli inassuteqarfiussalluni.
Tamanna angerlarsimaffimmi mattusimanermik taasarpaat. Tassa imaappoq, najugaqatitit qanillattussanngiivippatit, angerlarsimaffimmi immikkut ineqassaatit sapinngisamillu immikkut perusuersartarfeqarlutillu uffarfeqassaatit. Tamanna ajornarpat najugaqativit perusuersartarfik uffarfillu atorsinnaaniassammatigit atoreeraangakkit eqqiartassavatit.