Aaja Chemnitz: Takornariartaassuaqartarnera nunatsinnut akisuallaarpa?

Nunarput nunanit qanittumeersunit ungasissumeersunillu aasaq manna takornariaqarpoq. Takornariallu ilarpassui takornariartaassuarmi, Avannaata Kujataatalu akornanni umiarsualivinnut tikittartumi, ilaallutik tikipput.

Takornariartaassuit nunatsinni umiarsualivinnut aasaq manna tikittut maannamut 628-upput. Takornariartaassuit taakku ilaat tusintilikkuutaanik ilaasoqarput. 

Nunarput nunanit tamalaaneersunik takornariaqarluarnera soorunami qujarunnaraluartoq aamma illuatungeqarpoq.

Folketingimi ilaasortaq IA-meersoq, Aaja Chemnitz, taama isumaqarpoq:

- Ingammik takornariartaassuarmi ilaallutik nunatsinnut aasaq manna takoriat nakorsamit passunneqarnissamik pisariaqartitsisimasortaqaalupput. Tamanna nunatta Peqqinnissaqarfianut soorunami kalluaavoq, aammali Issittumi Sakkutooqarfimmut, taanna oqarpoq nangillunilu:
 

- Taamaammat nunarput takornariartaassuarnut qanoq piumasaqassanersoq oqallisigisariaqarparput. Takornariartaassuit nunatsinni inuiaqatigiinnik artukkiivallaartaqimmata, nunatsinni oqartussat qanoq isumaginnittuutigissanersut, aamma takornariartaassuarni ilaasut namminneq qanoq akiliitigitigisassanersut, taanna oqarpoq.

Suliassatik allat kinguartittariaqartaraat

Takornariartaassuarni ilaasuni ikiortarialinnik imarsiorlutik annaassiniariartortariaqarnertik pissutaalluni Issittumi Sakkutooqarfimmeersut suliassatik allat ilarpassui kinguartittariaqartarpaat.

Nunatsinnilu illoqarfiit inunnik aasakkut qaammatialunni ujameriapilooraangata, Peqqinnissaqarfipput ilungersuareeqisoq aamma nammakkerneqarneroriaannartarpoq.

Takornariartaassuarnik nunatsinnut tikittoqartarnera Peqqinnissaqarfimmut artukkersuutaasartoq, Aaja Chemnitzip arajutsisimanngilaa:

- Nunatta Peqqinnissaqarfia iluangersuanerulertartoq arajutsisimanngilluinnarpara. Peqqinnissaqarfillu ilungersuareerpoq. Tamannali Folketingimiit ajoraluartumik iliuuseqarfigingaarsinnaanngilarput.

Takornariartaassuarnut inatsisit sukannernerulertariaqartut

Inatsisaareersut aallaavigalugit umiarsuaatileqatigiiffinnut piumasaqaativut umiarsuaatileqatigiiffiit nunatta imartaani angallassinerannut aamma tunngasut, sukannernerulertariaqartut, Aaja Chemnitz isumaqarpoq. Angallavigisinnaasannillu killilersuinissaq aamma pisariaqarsinnaavoq:

- Takornariartaassuit marlukkaarlutik ingerlaaqatigiittalersinnaanersut nunatsinni politikkikkut oqallisaasareerpoq. Taamaalillutimmi ikioqatigiittalersinnaasassammata. Illersornissaqarfiummi umiarsui alapernaarsuutit ungasissorujussuarmiissinnaasarmata tikeriaannaasanngillat, taanna oqarpoq nangillunilu:

Angallavigisinnaasaat killilersorneqarsinnaanersut aamma oqallisaasareerpoq. Nunattami imartaata assiliornera amigarmat imarsiorfigalugu ulorianartorujussuusoq, taanna oqarpoq.

Naggataagullu minnerunngitsumilli takornariartaassuarmi ilaasut aallartinnatik nakorsamit peqqissutsimikkut misissorteqaarsimanissaat piumasaqaataalertariaqassasimavoq:

- Assersuutigalugu takornariartaassuarni ilaasuni peruluutiginngisamik nappaatillit peqqissutsimut sillimmasersimanissaannik piumasaqaatit sukannernerulersittariaqarnersut isumaliutigisariaqassasimavoq. Soorlu niuiartoqartillugu assingusumilluunniit ajoqusertoqartillugu annaassiniarujussuarnissaq pisariaqanngikkaat, taanna oqarpoq.