Demokraatit Atassullu: Umiarsuarnit takornariartaatineersunit isertitassaraluit aningaasarpassuit annaavaagut
- Umiarsuit takornariartaatit qiviaraanni, umiarsuarmi coronamut misissuivinnik peqartarput, aammalu piumasaqaataasarpoq umiarsuarmut ilaasussat tamarmik akiuussutissamik kapitereersimasussaasut. Taamaattumik isumaqarluinnarpunga, tassunga tunngatillugu malittarisassat annikillisinneqartariaqartut, nunatta karsia immissappat.
Umiarsuit takornariartaatit piaarnerpaamik nunatsinnukarsinnaalernissaannik kissaateqartoq, Demokraatit siulittaasuat, Jens-Frederik Nielsen taamak ersaritsigisumik oqarpoq.
partii Naalakkersuisunut ikorfartortaasoq, Atassut, taamatut aamma isumaqarpoq, malittarisassat qasukkarneqartariqartut. Atassutip siulittaasua Aqqalu Jerimiassen KNR-mut taama allappoq:
- Nunarput unittuuitsissinnaanngilarput. Takornariaqarnikkut suliaqarluartut (ilaat) annertuumik suliassaqartitsisarput aningaasarsiornikkullu sunniuteqarluartarlutik. Taamaammat inatsisit sukaterneqarsimasut sakkukilliallassinnaanerannut piffissannguleraluarpoq ammariartuaarnermut malinnaatillugu.
AAMMA ATUARUK Killilersuutit tamaatitsinerillu sumiiffinni takornariaqarnermut akornutaasut
Peqqissutsimut naalakkersuisoq: Innuttaasut peqqissusaat salliutittariaqarparput.
Taakku taama isummernerat peqqissutsimut naalakkersuisup Kirsten Fenckerip (Naleqqameersup) isumaqatiginngilaa, imalu allappoq:
- Maannakkorpiaq tuniluuttoqaleruttornerani innuttaasut taakkulu peqqissusaat salliutittariaqarparput. Umiarsuummi issimasuisa ilaat tunillaneqarsimagaluarpata tamatuma akiornissaanut nukissaqanngilagut. Peqqissutsikkulli imminut illersorsinnaanerulerutta malittarisassanik qasukkaanissamut periarfissat assigiinngitsut qimerloorsinnaassavagut, taanna oqarpoq.
Maannakkut malittarisassat naapertorlugit, umiarsuit takornariartaatit ullut 14-t iluani nunani allani umiarsualivimmi talinngasimagunik, nunatsinni umiarsualivinnut taleqqusaanngillat. Allatut oqaatigalugu, umiarsuarnik takornariartaatinik ingerlatsiviit nunatsinnukartitsinissaat ajornarpoq.
Demokraatit Atassut malittarisassanik qasukkaarususupput.
Nunatsinnut umiarsuarnik takornariartaatinik tikittoqartalissappat, qanorpiaq piumasaqaateqarusussagaluarpit?
- Ullumi 14-ini maanna inissisimasoq sapaatip akunneranut sivikillineqarsinnaangaluarmat, umiarsuarniilli niusussat niutingatik umiarsuarminni kviktesteqaqqaartarnissaattaaq siunertaasinnaalluni, Aqqalu Jerimiassen (A) allappoq.
- Naalakkersuisut ernumassutaat isumaqatiginngilara, nunatsinni peqqinnissaqarfiup artukkerneqaratarsinnaaneranik isumaqarnerat pillugu, tamannami aatsaat pisinnaasimassagaluarpoq, aatsaat umiarsuit iluamik malittarisassaqarluarnissaannik piumasaqarsimanngitsuugutta. Umiarsuit tikikkaluarpata ajornartorsiutissaqarsinnaaneranik takusinnaanngilara, tassami umiarsuit uppernarsaatissaqartitsereerput ilaasut tamarmik akiuussutissamik kapineqareersimanerannik aammalu umiarsuup iluani misissuisarfeqarnera pillugu ilaasut misissortissinnaapput. Imatut aaqqissuisoqarsinnaagaluarpoq, umiarsuit takornariartaatit minnerit 200-300-t missaani ilaasullit kisimik mianersuunnerussagigut, taama demokraatit siulittaasuat oqarpoq.
Aperaarpullu, umiarsuit tamakku qanorluunniit tuniluutitsinaveersaarumallutik isumannaallisarsimagaluarpataluunniit tuniluunnerup siammaratarsinnaanera annilaangaginnginneraa.
AAMMA ATUARUK Umiarsuartitsillutik takornariartitsisartut: Sooruna ilaatinneqanngitsugut
- Ernummatiginngilara. Eqqaamassavarpummi, 18-leereersimasut tamarmik maanna akiuussutissamik kapitissinnaatitaammata. Aammalu sanngiinnerusut utoqqaallu aamma kapitissimalereerput. Piumasarisinnaagutsigu, umiarsuarmi ilaasut tamarmik kapitereersimagunik aatsaat nunamut niusinnaasut, taava ernummatissaqanngilagut, tunillaanissamummi navianartortaa annikitsoralaaginnannguuvoq, Demokraatit siulittaasuat Jens-Frederik Nielsen oqarpoq.
