Svend katersuiniarluni katillugit 2.670 kilometeri arpattoq

Svend Rosing Olsen nunatta kujaterpiaaniit avannarpiaanut isorartutigisumik ulluni 355-ini arpappoq.

Svend Rosing Olsenip immikkuullarissumik peqquteqarluni ukioq manna 2.670 kilometerit arpanniarlugit anguniarniarlugu aalajangiunnikuuaa.

Anguniakkamini kilometerit kingulliit ullukinnermi arpammagit peqatigaarput.

2.670 kilometerit tassa nunatta isorartussusaatut takitigisoq ukioq manna arpanniarlugu Svend Rosing Olsenip aalajangiussimasani naammassigaluttuarpaa.

Svend Rosing Olsenip kilometerit pingasut amigaatigisani sisamanngornermi ualiartulersoq tapersersortini Uju Petersen peqatigalugu Nuummi apileruttortoq arpanniarpai.

- Sila apeqqutaatippallaarneq ajorpara. Siallerpat, nittaappat seqinnerpat, tamaasa. Ullut atugassarititaasut atorlugit arpattarpunga.

Taama anguniagaqassalluni ukiup aallartinnerani aalajangersimanngikkaluarpaa.

- Ukiaq 24 timers løbimik aaqqissuisoqarmat 110 kilometerit arpakkakku tassanngaanniit isumassarsimavunga: 'immaqami Kalaallit Nunaata iserartussusaata takeqataa arpakkukku?' Taava taamanili pimoorutilerpara.

Arpakkaangami arlaatigut anguniagaqartarpoq. Soorlu qaammatit pingasut matuma siorna Neriuffiit Kattuffiata katersuineranut arpannermigut katerseqataavoq.

Katersuiniarluni arpattoq

Ukioq mannalu arpariikkani, tassa 2.667 kilometerit aamma siunertaqartippaa.

- Nutaarsiassaniuna takusara attortissutigigakku Qaanaami piniartut piniariarsinnaanatik. Taavalu Facebookimi takusara taanna nerisassaalatsisut, kaallutik ilaanni ulloq atorsinnaasaraat. Taava isumassarsivunga: Uangattaaq aamma ikiuussinnaaguma Qaanaamiittunut Avanersuarmiunut ikiuussinnaaguma, qanorluunniit annikitsumik ikiuussinnaaguma aamma nuannaassaanga. Taamaallunga ulloq manna tikillugu qujanavissumik tapersersorneqarlunga pivunga.

Peqatgiiiffik Meeqqat angajoqqaallu peqqinnissaatigut ikinngutaat MAPI aningaasanik aamma katersuiniarmata, Svend Rosing Olsenip aningaasat katersani 7.670 koruunit MAPI-mut ingerlateqqippai. Suliffiit marluk tassani aningaasanik tapersiisuupput.

- Inuk artorsaatilik ikiortariaqarami. Inuk inuussutissarsiutiminik silaannaap allanngornerata kingunerisaanik eqqugaasoq ikiorneqartariaqarami.

Ullukinnermilu arpannera kilometerit pingasuinnaammata Svend Rosing Olsen tapersersortinilu oqitsorsiorpasillutik apuupput.

Taamatullu ukioq manna anguniakkani naammassivaa.

- Nuannaarpunga - soorunalimi. Assorsuaq. Tunniussillunga inuiaqatigiinnut ajunngitsuliorlunga.

Kalaallit Nunaanni tamaavissi juullisiorluarisi ukiumullu nutaamut iserluarisi. Tamassilu peqqillusi inuunersi ingerlakkisiuk, Svend Rosing Olsen oqarpoq.