Meeqqami arnaat eqqaaniarlugu 100 kilometerit sinnerlugit arpattoq
110 kilometerit rekordiliinerlu.
Tassaapput Svend Rosing Olsenip Neriuffiup sapaatip akunnerata naanerani nalunaaquttap akunnerinik 24-nik sivisussusilimmik arpatsitsinerani angusai.
- Pikkunaq, nuanneq angorusutara anguara, Svend Rosing Olsen apuukkami oqarpoq.
Siunertalimmik arpariarama uninngilanga
Takinerpaamut arpannissaq kisiat anguniarlugu arpassimanngilaq. Arpappoq qitornami marluk arnaat pillugu. Qitornaasami arnaata ukiuni pingasuni napparsimareerluni kræfternini 2019-imi toqqutigaa.
- Peqquterpiarpiaavoq meeqqama arnaat nappaassuup kræftimik aamma eqqugaalluni toqunikuugami, taamaasillunga paasigakku maani aaqqissuisoqalersoq aallaqqaataaniilli imminut neriorsorsimavunga peqataassallunga, 52-inik ukiulik Svend Olsen oqarpoq.
Ulluni marlunni 100 kilometerini arpanniarluni siunniutaqqaarpaa, sulili nukissaqartutut misigeriarami 24 tiimit qaangiunneranni 110 kilometerit anguai.
- Piumaffigigama ulloq siulleq 79 kilometeri angusinnaagukku ullup aappaanni 30 kilometeri naammassisinnaallugu. Taanna peqquterpiaavoq 79 kilometerimik kisitsisitalersimagakku arnaq ataaseq aamma eqqaaniarlugu.
- Isumalerujussuuvoq uannut, sunaluunniit angorusukkaangakku pimoorullugu ilungersorlungalu angutserlugu arpattarama, oqaluttuarpoq.
’Sapinngilatit’
79 kilometerimut ulloq siulleq 8 tiimit 23 minutsillu atorpai nukippassuillu atortariaqarsimallugit oqaatigaa. Imminullu naveerluni arpannissaminut nukissaneqqittarpoq.
-Nukissaneqqittarpunga imaalioraangama, imminut naviilaarlunga. Sapinngilatit! Isinnaavutit!
Svend Rosing Olsenip meeqqami arnaat eqqaajuaannarpaa, ullullu nuannersut atorsimasatik eqqaagaangamigit nuannersumut saattarluni.
Kisimiileramili maanna ukiut sisamat qaangiussimalerput, artornaraluaqisorlu inuuneq ingerlaqqittarpoq. Svend Rosing Olsenilu tulluusimaaqaaq.
Nalunaaquttap akunnerini 24-ni arpanneq, Neriuffiup Kattuffianut katersuiniussineq Uummannami 2021-mi aallartittoq, ukiut tamaasa sinerissami pisartunngorpoq. Nuummi arpatsitsisoqarnerani inuit 36-t peqataapput Uummannamilu inuit 86-it peqataallutik.