24-tiimit Nuummi Uummannamilu arpattoqarnerani: Illallattaarpunga qullilisarlungalu
Nuummiut Uummannarmiullu ullumi ippassarlu kiagulaavissorput
Nuummiut 36-t Uummannarmiullu 86-it ippassaq arfininngornermi ullup qeqqanut aallartittumi akunnerni 24-ni arpapput, ullumi sapaammi ullup qeqqanut arpannertik naammassivaat.
Arpanneq ippassaq Nuummi Uuummannamilu nalunaaqutaq ullup qeqqanut aallartippoq.
Katersuiniarluni arpannermi periuseq tassaavoq peqataasut immikkut aningaasaliisussarsiortarnerat.
Aaqqissuisut kontomut Siku Crossimut ikisiffissamik facebookkikkut siammarteripput katersat Neriuffiit Kattuffiannut septembarip ulluisa 29-anni katersuiniartoqalerpat checkimik Uummannamiit Nuuummiillu katersorsimasatik tunniutissavaat.
Uummannami arpattut katillugit 1.860 kilometerit arpappaat Nuummi 1.600 kilometerit arpanneqartut.
Ikinngutini eqqaaniarlugu arpaqataasoq
Arpannermik aaqqissuineq ukiuni siulini Uummannami Anguteeraq Grønvoldimit aaqqissuunneqartarpoq.
- Ukioq 2017-18 Tirstrupimi efterskolernikuuvunga tassanilu aamma katersuiniarluni arpatsitsisoqartarpoq. Tassanngaanniit isumassarsiaq pissarsiarivara aamma qangali anginerusumik Uummannami arpatsitsinissaq pilerigisarakku, Anguteeraq Grønvold 2021-mi KNR-imut oqarpoq.
Ukioq manna Nuummi arpatsitsineq siullermeerluni ingerlanneqarmat Heidi Jørgensen misigisaqarlualaavippoq.
- Ajunngilanga, sanneqqalereerpunga. Pikkunarpoq aatsaat taama takitigisumut arpakkama. Kisianni ajunngilaq nuannerpoq, qiasarlungalu illartarlungalu arparujoorpunga.
Aviaaja Pregaard Nuummi arpaqataasut ilagaat.
- Arpannermut peqataarusussimavunga, kammalaatiginerpaasara 40-nik ukioqarluta kræfterluni toqunikuugami tassanngaannaq. Taava eqqarsaatinniilluni, kræftimullu katsorsaanissanut tapeerusullunga peqataavunga..
18-inillu ukiulik Rico Christensen arpaqataanissani pingaartippaa, taassumammi 100 kilometerit arpappai anertikkalaarlunilu ima KNR-imut oqaluttuarpoq
- Massakkut qasusorujussuuvunga, nissukka sanneqqapput.
- Ajorisassaanngilaq, kisianni 77 kilometereqqammerlunga arpassinnaajunnaarama sinnera pisuppara, kisianni 2 kilometerit kingulliit arpappara.
Rico Christensen oqarpoq.
Neriuffiit Kattuffiata paasissutissaatai naapertorlugit ukiumut 170-it missaanni nunatsinni nappaassuarmik kræftimik eqqugaasarput.
Arpannermillu aaqqissuisut Nuummi Uummamilu aningaasat katersatik kisinneqareeriarpata saqqummiunneqarumaartut oqaatigaat.