Kræfteqartut katersuiniullugit Anguteeraq Grønvold akunnerit 24-it arpatsitsilerpoq
Uummannami arpakkamatuut kræftimik eqqungaasunut katersuiniussissamaalerput.
Tassami 19-nik ukiulik Anguteeraq Grønvold nalunaaquttap akunnerini 24-ni arpatsitsissamaarpoq peqataasullu qanoq isorartutigisumut arpannissartik nammineq aalajangissavaat.
Peqataasut aamma nammineq aalajangissavaat arpakkusunnerlutik imaluunniit pisuttuassanerlutik. Naatsunik oqaatigalugu; kikkulluunniit peqataasinnaaqqullugit.
Aaqqissuisoq Anguteeraq Grønvold suli aalajanginngilaq arpatsitsinerup akunnerni 24-ni ingerlanerani qanoq takitigisumut arpassannerluni – sapinngisamilli takisuumut arpassamaarpoq.
- Ilimanarpoq angerlarlunga sinitsiartariaqassasunga. Tassa arpatsitsinermi akunnerit 24-it tamakkerlugit arpannavianngilanga, Anguteeraq Grønvold oqarpoq.
Arpannermik aaqqissuisoq Anguteeraq Grønvold Uummannami arpatsitsillattaalereerpoq timersuut taanna timersuutinit allanit takussaanerunngikkaluartoq.
- Ukioq 2017-18 Tirstrupimi efterskolernikuuvunga tassanilu aamma katersuiniarluni arpatsitsisoqartarpoq. Tassanngaanniit isumassarsiaq pissarsiarivara aamma qangali anginerusumik Uummannami arpatsitsinissaq pilerigisarakku, Anguteeraq Grønvold KNR-mut oqarpoq.
Katersuiniarneq isumalluarfigaat
Katersuiniarluni arpannermi periuseq tassaavoq peqataasut immikkut aningaasaliisussarsiortarnerat.
- Aningaasat aalajangersimasumik amerlassusillit tunniunneqarsinnaapput imaluunniit arpannermi kilometerit arpanneqartut najoqqutaralugit aningaasaliisoqarsinnaalluni, Anguteeraq Grønvold nassuiaavoq.
Aaqqissuisut kontomik ammaassamaarput aningaasat katersat inissinneqarfissaannik tassanngaanniillu Neriuffiit Kattuffiannut nuunneqarumaarput.
- Aningaasat qanoq amerlatigisut katersussanerivut oqaatigiuminaappoq. Kisianni aningaasarpaalunnik tunniusserusuttoqalereerpoq. Aammami arpannissap tungaanut suli piffissaqarluarpoq, Anguteeraq Grønvold oqarpoq.
Katersuiniarluni arpanneq arfininngorneq septemberip 25-at aallartissaaq arpannerullu ingerlanerani ilannguttoqarsinnaavoq.
Neriuffiit kattuffiata nuna tamakkerlugu katersuiniarnera arfininngorneq oktoberip aallaqqaataat pisussaq KNR-TV-mi toqqaannartumik aallakaatinneqassaaq.