Najannguaq Mathæussen Upernavimmeersoq pisariaqartitsisunut ikiuuttoq: Meeqqat eqqarsaatiginerpaavagut

Juullip kingorna januaari amerlasuunut akisusinnaasoq sivisusinnaasarpoq.

Upernavimmi innuttaasoq, Najannguaq Mathæussen nunatta avannaani illoqarfimmi pisariaqartitsisunut nerisassanik ataasinngormat agguaavoq.

- Eqqarsaatigalugu meeqqat utoqqaallu, meeqqat aamma taakku immaqa pinerullugit taava ajunngitsuliorusullunga eqqarsaatigigakku aalajangerpunga pajuttorniarlunga tassanngaanniit aalajangerpunga, Najannguaq Mathæussen KNR oqarpoq.

Taassuma ajunngitsuliorneq Nuummi ajunngitsuliortut isumassarsiffiginerisa kingorna siorna aallartippaa.

- Isumassarsiaq eqqarsaatigilerlugu aamma Upernavimmi taamannak pisariaqartitsisoqartarmat, ukioq kingulleq aallartippara aamma ukioq manna.

Illoqarfimmi ikioqatigiittut

Nerisassanik agguaanera illoqarfianni allanit ikiuisoqarneratigut periarfissaavoq. Upernavimmimi nunaqqatai nerisassanik tunniussaqarput.

- Taava ataasinngornermi inuit pajullattaapput, ikiortissarsiorama facebookimi taamaallunga anaanagalu illortaaralu ikiuullutik aallartipput, Najannguaq Mathæussen oqarpoq.

Upernavimmi taxartartoq nammineq kajumissutsiminik aamma ikiuunniarluni nerisassanik ingerlasseqattaarpoq.

AAMMA ATUARUK Ullorsiutinit isertitat arsanik 800-nik Kommuneqarfik Sermersuumut tunissuteqaataasut

Inuit nerisassanik pisariaqartitsisut 37-t Najannguamut facebookikkut nalunaarsimapput, inuillu suut amigaatiginerunerlugit allattarsimapput.

Nerisassanik amigaateqartut 37-t sunik amigaateqarnerlutik Najannguaq Mathæussenimut Facebookikkut saaffiginnipput.

Taakkulu immuit imaluunniit igaassat amigaatigisinnaagaat taassuma oqaatigaa.

Najannguaq Mathæussen inunnit pajuttorfigisaminnit qujamasuffigineqangaatsiarsimavoq.

- Qujamasuttorujuusarput ilai tuppallerlutik, soorlu qujareeraluarlutik ilai allaqqittarlutik messengerinnut ilai qiallutillu. Taava ataaseq nassuiaagami allassimalluni pisariaqartitsilluni qiallunilugooq allalluni nerisassanik soqanngivillutik taava qujarullugu assut taama pajunneqarlutik.

- Soorunami nuannerpoq isigalugit taamannak qujallutillu pisut attortinnarlutik, Najannguaq Mathæussen oqarpoq.

Taassuma inuit 50-it missaanniittut ulluni qulini amerlanerusuniittut ikiorsimallugit naatsorsorpai.