KAK arsaattartut sungiusaasuanut isumaqatigiissutertik sivitsoraat

Kalaallit arsaattartut kattuffiat, KAK, nuna tamakkerlugu sungiusaasumut Morten Rutkjærimut isumaqatigiissutertik sivitsorpaat.

Nuna tamakkerlugu angutit silami arsaattartuinut sungiusaasoq, Morten Ruthkjær, juulip naggataani 2023-p tungaanut sungiusaasuussaaq.

Tusagassiuutinut nalunaarummi KAK taama allappoq.

- Morten Ruthkjærimut isumaqatigiissuterput sivitsorsinnaagatsigu nuannaarutigeqaarput. Nuna tamakkerlugu arsaattartoqarnermut inerisaanissamik Morten ulloq siullermiit sunniuteqaangaatsiarpoq, kattuffimmiit, arsaattartuniit peqatigiiffinniillu isumassarsiai isumaqatiginikooqaarput - arsaannermut tunngasumik pitsaasumik ineriartorpugut.

AAMMA ATUARUK KAK får ny landstræner til fodboldlandsholdet

KAK-p arsaattartut kattuffianni siunnersorti Nîsínguak’ Lundblad Geisler tusagassiuutinut taama allappoq.

Morten Rutkjær nuna tamakkerlugu arsaattartunut siorna sungiusaasunngorpoq.

Siornatigut danskit peqatigiiffiinni assigiinngitsuni sungiusaasuunikuuvoq - ilaatigut Københavnimi peqatigiiffitoqqat B.93, FREM Vanløselu. Morten Rutkjær UEFA Pro licens sungiusaasutut ilinniarsimavoq.

- Inuttaa kinaassuseqartorujussuuvoq sungiusaasorissallugulu tulluusimaarnartorujussuulluni. Arsaannermi arsaqatigiittartutullu ataqatigiisinnaaneq, arsaqatigiittartutullu ineriartortuaannarsinnaanermut tunniusimanissaq Mortenip pingaartippaa, arsaattartut kattuffianni siunnersorti Nîsínguak’ Lundblad Geisler oqarpoq.