Qooqqut Festival: Sumit kingoqqisuunerput eqqaasitsissutigerusupparput
Ukioq manna Qooqqut Festival Nuup Kangerluani aaqqissuunneqarnera ullumi aallartippoq, tassanilu ilaatigut nipilersortoqartassaaq, qitsittoqartassaaq oqalugiartoqartassalluni.
Ukioq manna Qooqqut Festivalernissamik aaqqissuisut ilaat, Jakob Søvndahl Skovaa oqaloqatigaarput. Taanna Nuummi Kulturip Illorsuata aaqqissuisuisa pisortaraat.
Ullumi aqagulu Qooqqut Festivalernissamut piareersaatitik naammassipajaartut, Jakob Søvndahl Skovaa oqarpoq.
- Piareersaatigut naammassipajaarput. Massakkununa tassa Qooqqut tungaannut ingerlaarujoortugut umiarsuaaqqamut ikilluta arriitsuaqqamik ingerlaarpugut. Piareersaatigut naammassipput, kisianni soorunami suli, aatsaat tallimanngorpat festivali aallartittussaagami, taava suli annikitsuaqqanik isumagisassaqalaarput Katuamiittut, taanna oqarpoq.
“Nunat Issittormiut Inui”
Qooqqut Festival Nuup Kangerluani ukiorpaalunni kingullerni ukiassariartulernerani aaqqissuunneqartarpoq. Pisarnertullu assigiinngitsorpassuarnik allanilli nuannersunik aamma pisoqarumaartoq, Jakob Søvndahl Skovaa oqarpoq:
- Ukioq manna taavalu ukiuni pingasuni tulliuttuni festivalernissat Nordea-fondimiit taperneqarnikuugamik, taamaalilluta siusinnerusukkut pilersaarusiortalersinnaavugut. Taava massakkuminngaanniit ukioq manna qulequtarivarput “Nunat Issittormiut Inui”, taamaalilluta uku Nunavummiut, Alaskamiut Sápmimeersullu tikisinnikuuagut, taanna oqarpoq nangillunilu:
- Taavalu aamma taanna siunissami ineriartortikkusullugu amerlanernik peqataatitaqarusuttarluta. Tassami ilaqutariinnut meerartalinnut pilersitaavoq, taakku peqataanissaat siunertaralugu, tunngaviusumillu festivali taamatut ingerlaannassaaq, taamaallaat imarisaa allanngulaartarluni.
Kulturerput qitiutikkaat
Eqqumiitsuliortunik nunanit tamalaaneersunik aamma peqataasoqassaaq, kalaallillit kulturiat festivalimi qitiuinnassalluni. Issittormioqatitta paasisaqarfiginissaat isumassarsiorfiginissaallu pingaaraluartoq siulitta periuserisimasaasa attannissaat pingaartoq, Jakob Søvndahl Skovaa oqarpoq:
- Uagut uani festivalimi pingaartipparput kalaallit ileqqugut, periusigut kulturerpullu ataavartumik atorneqartarnissaat, imaluunniit sammineqartarnissaat. Taamaalilluta sumit kingoqqisuunerput eqqaassagatsigu.
Festivalip pinissaanut qilanaarluni peqataasorpassuaqarnissaalu neriuutigigini, Jakob Søvndahl Skovaa Qooqqut tungaannut ingerlaarnerani oqaloqatigigatsinni oqarpoq:
- Neriuutigivarput inuit eqqissiivillutik soorlu internettimut attaveqarnatik, telefonimut attaveqarnatik, ulluinnaat iperalaarlugit ilaqutariillutik meeqqatik ilagilaarlugit, imaluunniit qanigisat arlaat, nuannisaqatigiillutik sammisaqaqatigiillutik arlaatigut misigisaqarumaartut. Soorunami aamma nipilersortartut nuannersut tusarnaarnissaat taanna ilimagineqarsinnaaqaaq, taanna oqarpoq.
