Nunavummiu Qooqquni peqataalersoq
![Kelly Fraser](/sites/default/files/styles/image_934x467/public/kelly_fraser.jpg?itok=dbq5rCnn)
Kelly Fraser nammineq taalliaminik inuktitut popinik rockinillu erinarsortarpoq, ilaatigullu nipilersukkanik nunarsuaq tamakkerlugu tusaamaneqarluartunik inuktituunngortitaminik appisimaartarpoq.
Soorlu USA-mi erinarsortartup Rihannap atugaa inuktituunngorlugu appikkamiuk naggueqatimini tusaamasaassutigilerpaa.
Nuusiaa 'Sedna' apriilip 25-ani 2017-imi saqqummerpoq.
Kelly Amaujaq Fraser nunatsinnut tikeqqammivoq. Nunavut nunattalu piorsarsimassutsikkut inuppalaassutsikkullu assigiinneri, erinarsortartup alutorsaatigeqaa.
- Kulturigut oqaatsigullu assingupput, Nunavummi Kalaallit Nunaannilu assigiippugut. Qujaqaangalu maangarnissara kissaatigineqarsimammat, Kelly Amaujaq Fraser oqarpoq.
Qooqqut Festivalimi suleqatigiiaartoqarluni assigiinngitsunik timersortoqassaaq, qajartortoqarluni, isiginnaartitsisoqarluni pinnersaasiortitsisoqassallunilu. Kelly Fraser appisimaarnerup saniatigut taalliornermik aamma pikkorissaassaaq.
Nipilersortartut arlallit, soorlu Qarsoq Frederik Elsnerilu festivalertoqarnerani aamma appisimaassapput.
Kelly Fraserillu kalaallit nipilersortartut nuannaartorilluinnarpai.
Namminerli inuktitut taalliani erinnianilu festivalimi appissavai. Qilanaaqaarlu, kalaaliminertornissanilumi utaqqisinnaanngingajappaa:
- Kalaalimertornissara pissanngatigaara. Ippassaq mattattorpunga allanillu aamma ussiinissara qilanaaraara,
Nunavummiu erinarsortartoq, Kelly Amaujaq Fraser, oqarpoq.
Qooqquni festivalertitsineq imigassartaqanngilaq akeqaranilu. Septembarip arfineq-pingajuaniit qulingiluaata tungaanut festivalertoqassaaq.