Qooqqut Festival: Ileqqutoqqavut qitiutillugit

Sapaatip akunnerata naanerani Qooqqumi tupit napparneqarpata ulluni marlunni Kaassassuk pillugu oqaluttuatoqaq sammisaralugu pikialaartitsineq aallartinneqassaaq.

Oqaluttuartussaq Inge Olsvig Brandt naapertorlugu kalaallit kulturitsinni oqaluttuatoqaq taanna pingaaruteqaqaaq, pissutigalugu kalaallit amerlanerpaartaat oqaluttuami imminnut qiviarsinnaasarmata, taamaammallu pikialaartitsinermi aliikkusersuinerpassuarni oqaluttuatoqqap aallaavigineqarnissaa taassuma nuannaarutigaa.

- Nunatsinni najugallit oqaluttuamillu taassuminnga ilisimannittut tamarmik oqaluttuamut namminneq inuttut atassuteqarlutik misigisimasut isumaqarpunga. Oqaluttuatoqqammi pileqqaarnermillu oqaluttuat namminermi misigisartakkatsinnik tarrarsortitsisarput. Misigissutsitsinnik tarrarsorfiupput, Inge Olsvig Brandt oqarpoq.

Oqaluttuatoqqami Kaassassuk iliarsuk najukkamini immikkoortinneqarpoq, taannalu pissaap inuanit nakuarsuanngortinneqarpoq.

Oqaluttuaq immikkoortunik pingaarutilinnik imaqartoq taakkualu ersersinneqartariaqartut, Inge Olsvig Brandt isumaqarpoq. Taamaammat nukappiaraq iliarsuk oqaluttuarileruniuk oqaluttuarnera atuaanerinaassanngilaq.

- Oqaluttuassanni aalajangersimavunga Kaassassuk uangalu issiaqatigiilluta eqqarsaasersortugut oqaluttuarmi peqatigiilluta oqaluttuarissagatsigu.

Kaassassup najugaa qanillugu

Inge Olsvig Brandtip oqaluttuarnissaa tusarnaartut peqataanissaannut aggersaassaaq.

- Asimi, isiginnaariartarfimmiunngitsoq issiaarsinnaassasugut takorloorpara. Kaassassup najugaani issiaassaagut. Kaassassuk uangalu ataatsimoorfimmik mindfuliusumik isumalioqqissaarfiusumillu pilersitsissaagut, tassani peqataasut peqatigalugit tamatta immikkut aamma ataatsimut nukitsinnik, qaamanitsinnik, ilisimassutsitsinnik paasisimasatsinnillu pilersitsilluta inissaqartitsissaagut, taanna oqarpoq.

Oqaluttuatoqqap oqaluttuarineqarnerani imminut isiginiarsinnaaneq imminullu maluginiarsinnaaneq inissaqartinneqarumaartut taassuma neriuutigaa. Peqataasut suut tamaasa qimallugit qamuuna iluminnut tusarnaarsinnaallutillu maluginninniarsinnaassasut neriuutigaa.

Oqaluttuatoqqat kisiat sammineqassanngitsut

Kaassassuk pillugu oqaluttuatoqqap sammineqarnerata saniatigut workshoppertitsineq aallartinneqarpat ileqqutoqaq kingornussimasarput uaajeerneq aamma misilissinnaavat. Tassani ileqqutoqqamut ukiunik 4.000-inik utoqqaassusilimmut ilisaritinneqarsinnaavutit. Uaajeerneq peqqissaanertut, ersisaarinertut nuannisarnermulluunniit atorneqartarpoq.

Nipilersortartut assigiinngitsut 11-t appisimaalerpata aamma tusarnaaginnarsinnaavatit imaluunniit ilaatigut pilersaarummi ilaasut filmit marluk isiginnaarsinnaavatit.

Oqaluttuartoqarneranut uaajeernermulluunniit peqataarusukkuit taakkua arfininngornermi nalunaaqutaq 14 aamma 17 aallartissapput.