Sulorarnermi nunat tamalaat ataatsimeersuarnissaat Nunatsinniisinniarneqarpoq

Europami sulorartartut kattuffissuata Nunatsinni ataatsimeersuarsinnaanissaa pillugu pisinnaanissaa pinnagu qaquguli pinissaa oqallisigineqarpoq

Taamaattumik Nunatsinni sulorartartut kattuffiat Badminton Kalaallit Nunaat piareersalereerpoq Badminton Europep 2026-mi ataatsimeersuarnissaani aaqqissuisuunissamut qinnuteqarniarluni.

- Badminton Europep aamma Badminton World Federationip ataatsimeersuartarnerini 2013-miilli peqataasalerama apersuutigineqartarpoq qaqugu Kalaallit Nunaat aaqqissuisuussamaarnersoq, Badminton Kalaallit Nunaanni siulittaasoq Michael Kleist oqarpoq.

Apeqqut tamanna uteqqinneqarpoq Badminton Europe upernaaq ataatsimeersuarmat Badminton Kalaallit Nunaata peqataaffigisaanik.

Eqqaaneqareersutummi eqqarsaat nutaajunngilaq. Angalaniarnermili pissutsit aqqutaani arlaleriarluni timmisartunut allanut ikisarnissat Nunatta aaqqissuisuujumalluni qinnuteqarnissaanut nangaassutaasarsimapput.

- Takorloorsinnaavara Nuummi mittarfissuartaarpat inissisimalluarnerulissasugut. Taamaattumik aalajangerpugut 2026-mi aaqqissuisuunissaq qinnutiginiarlugu, Michael Kleist oqarpoq.

Unammersuarneq imaluunniit naagga

Kalaallit Nunaat nunat tamalaat sulorarnermi kattuffissuanni BWF-mi 1997-imi ilaasortanngorpoq taamanikkullu Europamiut kattuffissuannut nunanik 44-nik ilaasortaqartumut ilanngutsinneqarluni.

Nunat ilaasortaasut amerlasuut sineriaqanngillat issittumiinnikuunatillu.

- Badminton Euope Budapestimi qanittukkut ataatsimeersuarmat qinnuteqarsinnaanerput eqqartoratsigu Nunatsinnut tikeraarnissamut qilanaalereerput 2026-mi aaqqissuisutut akuerisaassagutta. Taamaattumik aaqqissuisuussagutta naatsorsuutigaarput amerlasuut peqataajumaartut, Michael Kleist oqarpoq.

Suli nalunarpoq ataatsimeersuarneq iluatsillugu nunanit tamalaaneersut unammersuartinneqassanersut.

Michael Kleist KNRimut ilisimatitsivoq suli nalorninartut arlaqarmata ataatsimeersuarnerup nalaani unammisitsinissaq suli isummerfigineqanngitsoq.

Badminton Europep ataatsimeersuarnerani peqataasut peqataanertik nammineq akilertarpaat Europamiut kattuffissuanniit tapertilaarlutik.

Qinnuteqarnissamut killigititaasoq tassaavoq 2025-mi februaari.