Sulorarnermi pissartanngorlaaq: Kiisami
Emilie Sørensen aamma Toke Ketwa-Driefer sulorarnermi Nunatsinni pissartanngorniunnermi angusat akimanersaannik angusaqarput.
Taanna tassaavoq inersimasuni ataasiakkaarnermi pissartanngorneq finalemilu tamarmik immikkoortut marluk atorlugit ajugaapput.
Emilie Sørensenip finalemi Tina Amassen Rafaelsen unammivaa qularnaalluartumilu ajugaalluni 21-11, 21-16-mik. Taannalu ajugaaneq assut nuannaarutigivaa:
- Kiisami, Emilie Sørensenip KNR-mut oqaasia siulleq taamaappoq.
- Ukiut marluk kingulliit assut tamaviaarsimavunga una angusaq anguniarlugu assorsuarlu nuannerpoq oqarsinnaalerluni tamanna angusimallugu, oqaatsini ilavai.
Emilie Sørensenip siornatigut Tina Amassen Rafaelsen Nunatsinni pissartanngorniunnerni unamminerni aalajangiisuni unammisareerpaa ukioq mannalu pisussaq tikillugu ajorsarfigisareerlugu.
- Ingasassuaarpoq. Finalep naammassineraniit nalunaaquttap akunnera siulleq ajugaasimallunga suli paasivikkunanngilara, Emilie Sørensen maanna ilinniagaqarluni Danmarkimi najugaqarluni Viborgimi sulorartartuusoq oqarpoq.
- Nuannaarnerujussuaq misigivara imminullu tulluusimaarutigivunga pissartanngorsinnaagama aammalu malugigakku sungiusartuarneq imminut akilertoq, Emilie Sørensen oqarpoq.
Angutit arnallu akuleriillutik unammineranni aamma Maluk Tiger Christoffersen iligalugu iligalugu pissartanngorpoq arnallu iligiiaarneranni Thrune Amassen Rafaelsen iligalugu sølvinnaqataalluni Tina Amassen Rafaelsen aamma Cecilie Josefsen B-67-meersut ajugaasut.
Allannguisoqarpoq
Angutit inersimasut pissartaannik aamma allannguisoqarpoq ukiorpassuarni pissartaasartoq Jens-Frederik Nilesen Nuummi B-67-meersoq Toke Ketwa-Drieferimit maanna Danmarkimi ilinniagaqartumit ajugaaffigineqarmat.
Arnat finalernerattulli angutit finalerneranni angusat kisitsisaat taakkupput; 21-11 aamma 21-16.
- Assupilorussuaq nuannaarpunga aammalu tulluusimaarutigalugu tamaviaarlunga sungiusartuarnera, Toke Ketwa-Driefer KNR-mut oqarpoq.
- Siornatigut arlaleriarlunga Jens-Frederik Nielsenimut ajorsartareerpunga kiisamilu ajugaallunga annertuumik nikingaffiusumik. Tamanna assupilorujussuaq nuannaarutigivara, Toke Ketwa-Driefer oqarpoq
Taamaasilluni angutini inersimasuni kinguaariinni nikittoqarpoq Frederik Elsner peqatigalugu Jens-Frederik Nielsen ukiorpassuarni ajugaasuusareersoq. Taamaattumik pissartanngorneq isumaliutigeqqinneqarpoq.
- Aallaqqaammut taama pisoqarnera paaseqqissaarunanngilara. Oqaasertaleruminaappoq. Maannali nuannaaqaanga qasullungalu, Toke Ketwa-Driefer naggasiivoq.
Taanna aamma angutit iligiiaarneranni Sebastian Reimer Bendtsen iligalugu sølvinnappoq Jens-Frederik Nielsen aamma Maluk Christoffersen pissartanngortut.
Sulorarnermi pissartanngorniunnermi angusat tamaasa uani takusinnaavatit.
