Futsal: Brasiliamiut unammilleruminaaqisut oqaluttuarisaanermut ilannguttumik kalaallit unammivaat

Arsaannermi Brasilia aamma Kalaallit Nunaat unammissut.

Immaqa soorlu quiasaarut pikkunaatsoq. Tamannali pingasunngornermi unnukkut Brasiliami illoqarfimmi Curitibami pivoq.

Tassami kalaallit futsalimi nunanut allanut unammisartut nunarsuarmi pissartanut Brasiliamut International Futsal Cup-mi unammipput. Ilimagisaareersutut Brasilia ajugaavoq. Isertitsinertigut 13-0-rput muminnermi 6-0-mik siuaqqareersut.

- Ilimageriikkatsitut Brasiliamiut pikkorissorissorujussuupput nuannaartunarluik. Aamma ilimageersimavarput nunarsuarmi pikkorinnerpaanut unammineq sakkortussasoq aammalu taama pisoqarpoq. Brasiliamiut ilisarnaataat ataasiakkaarluni pikkorissuseq qaffasissorujussuaq takutippaat, kalaallit anføreriat Lars-Erik Reimer KNR-mut oqarpoq.

Iluatsitsisutut misigivoq

Kalaallit arsartui arsartaleqqaaramik takorloorsimagunanngilaat ullut atlaanni nunarsuarmi pissartanut unammiumaarlutik.

- Uanga aamma takorloorsimanngisaannarpara nunarsuarmi pissartanut unammiumaarlunga. Angisoorujussuuvoq taamatullu periarfissinneqaratta pissanganikooqaagut, Lars-Erik Reimer oqarpoq.

- Taamatut periarfissinneqarama assorujussuaq iluatsitsisutut misigisimavunga. Aamma imaallaat takuarput nunarsuarmi pikkorinnerpaanut sanilliulluta sumiinnerluta aammami nunarsuarmioqatitsinnut sanilliulluta, Lars-Erik Reimer oqarpoq.

Sisamanngornermi unnukkut kalaallit Afghanistanimut unammissapput taakkulu Brasiliamiut pikkorissusaannut sanilliukkaanni appasinnerungaatsiarput.

- Soorunami pikkoripput, Brasiliamiutullu pikkoritsiginngillat. Taamaattumik ilimanarsinnaavoq arsap tigumminerunissaanut periarfissaqarumaartugut taamalu tunioraateriaatsivut atorsinnaassallugit. Unamminerli sakkortujumaarpoq, Lars-Erik Reimer oqarpoq.

Afghanistanimut unammineq nalunaaqutaq 19.00 aallartissaaq KNR2-mi toqqaannartumik isiginnaarneqarsinnaassalluni.