Sisoraaserluni ooqattaasarneq: Sondre Slettemark oqaluttuarisaanermut ilannguttumik nersornaatisivoq

20-nik ukiulik Sondre Slettemark Nunatsinni timersornermi oqaluttuarisaanermut ilannguppoq.

Tamanna pivoq nersornaat The Globe inuusuttuaqqani pissarsiarigamiuk uani ukiumi unammiffiusumi inuusuttuni ataatsikkut aallarnermi kakkannersaagami. Tamannalu tunngavilerpaa januarimi unamminerni inuusuttut unammineranni IBU Junior Cupini pikkorinnerit akornanniikkami.

Inuusuttut VM-qarnerannut naammasseqqammersumut Sondre Slettemark isumalluarsimagaluarluni nuffaserami unamminermi ataasiinnarmi peqataavoq kingulliit akornannut inissiluni.

Taamaattumik nersornaatisiani tigugamiuk assut qungujulavoq.

- Taanna uppernarsaataasinnaavoq inuusuttuni VM-mi iluatsitsinerlukkaluaqalunga ingerlalluaraangama nunarsuarmi inuusuttuni kakkannerpaat akornanniillunga, Sondre Slettemark oqarpoq.

Taanna aasamiit inersimasunut qaffattussaavoq anguniakkilu tulleq ummiutereerpaa.

- Ukiumi unammiffiusumi tullermi OL-mut anngunnissaq anguniassavara. Sondre Slettemark oqarpoq.

Nakersartariaqarpoq

Maanna Estlandimiippoq inersimasut unammineranni IBU Cupimi peqataassalluni tassannganniillu Oslomut aamma unammiartussaaq.

- Unamminerit taakku OL-mut anguunniarnermi atorsinnaalluarput, Sondre Slettemark nassuiaavoq.

Inersimasuni unammeqataasarnermini misilittakkanik katersilluarpoq unamminerni taakkunani uniornerit sekundillu ikittuinnaagaluit pikkorinnerit appasinnerillu nikingassutigisinnaammatigit. Taamaattumik piukkunnaateqaqisoq suli toraajuninngorusuppoq.

- Ilaana. Maannakkorpiaq nakerpunga. Seqqorluartarpunga kisianni pikkorinnernut sanilliullunga seqqorniartarnera kigaappallaarpoq. Taamaattumik aasamut ukiamullu tamanna sungiusarnerusariaqarpara, Sondre Slettemark oqarpoq.

Eqqarsartaatsikkut aamma nukittorsarniarpoq unamminermi apuutilernermi tamanna sunnerneqarsinnaasarmat.

- Eqqarsartaatsimut tunngasut ersarinnerusarput ataatsikkut aallareerluni seqqornermi assersuuteqassaguma. Maanna ataatsikkut aallarnerni misilittagaqarluarpunga ingerlalluarnerni pisut siunissami iluaqutigisinnaallugit, Sondre Slettemark oqarpoq.

Ataatsikkut aallarnermi 60-it ataatsikkut aallartarput taakkunannga apuuteqqaartoq ajugaasuusarluni.