Jørna-Marie Larsen Special Olympics World Winter Games-mi kultinnappoq
»Pissartat – pissartat – pissartat«.
Nipi tutsiuttoq siulleq taannaavoq Special Olympics World Winter Games-mi kalaallit Danmarkimeersullu angalaqatigiit KNR-iup oqarasuaatikkut attavigimmagit.
Unammersuarneq taanna tassaavoq ineriartornikkut innarluutillit ukiuunerani OL-qartarnerat Italiami sisorartarfissuarmi Torinomi ullumi naammassisoq.
22-nik ukiulik Jørna-Marie Larsen sisoraaserluni oqilaniunnermi unammeqataasoq timersornikkut Nunatsinni oqaluttuarisaanermut ilannguppoq.
Misigisaq nuannersoq
Tassami kalaallini sisorartartuni siullersaalluni Special Olympics World Winter Games-mi kultinnappoq.
- Misigisaq nuanneqaaq, nuannaaqaluni oqaasissaaleqisoq Jørna-Marie Larsen KNR-mut oqarpoq angalaqatai nuannateqalutik tunuani nilliarpaluttut.
Jørna-Marie Larsenip angajoqqaavi aamma Torinomut angalaqataapput panitsik tapersersoriartorlugu.
Naatsumut 500 meterimut unamminermi Jørna-Marie Larsen ajugaavoq. Tassani tulleriiaarlutik aallartarput. Tamarmillu apuutereermata piffissat atorneqartut unamminermi nakkutilliisut misissoreermatigit tulleriinneri nalunaarutigineqarput.
- Kingusilaartukkut aatsaat paasivarput, assaa nuanneq, Jørna-Marie Larsen oqarpoq.
Nuannaarnerup pianik qullilipput
Angalaqatigiillu nuannateqaat angusat sungiusaasunut nassiunneqarmata.
- Nerisarfimmiilluta nalunaarfigineqaratta nuannateqaagut. Nuannaarnermut tamatta qullilivugut nuannaangaarattalu silaarutingajattarluta, sungiusaasoq nuannaaqisoq Maja Heilmanna Sisimiuniit angalaqataasoq oqarpoq.
Angusap annertunera qularutiginngivippaa;
- Angusaa oqaluttuarisaanermut ilannguppoq. Special Olympics World Winter Games-mi kalaallit siullerpaamik ujaminnapput. Taamaattumik angusaq annertoorujussuuvoq, Majaq Heilmann oqarpoq.
Oqaatsinilu naarpianngikkai angalaqataasut tunuani nilliarpalulerput:
»Pissartat – pissartat – pissartat«.
Special Olympics World Winter Gamesimi kalaallit peqataanerat Islandimiit tunissutaavoq.
Qeqertaq taanna innermik anitsisarfiusoq inissanik marlunnik tunineqarsimagaluarpoq sisorartartunilli peqataatitassaqaratik.
Islandinip inissaatini Danmarkimut tunniuppai piumasaraluguli inissat taakku kalaallinut tunniunneqassasoq. Kalaallit qallunaat erfalasuat atorlugu unammeqataapput sisorartartut nunarsuarmi kattuffissuani Nunarput immikkut ilaasortanngimmat.
Jørna-Marie Larsen aamma Nuka Martin Lynge peqataasussat toqqarneqarput. Nuka Martin Lyngelu unammeqqilereerpoq. Tassami nunarsuarmi sisoqqannerit sakkortunersaanni Arctic Circle Racemi peqataasussatut nalunaareerpoq.
