Oqaluttuarisaanermut ilannguttut: Kalaallit sisorartartut marluk Special Olympics World Winter Gamesimi peqataalersut
Jørna-Marie Larsen Aasianniit aamma Nuka Martin Lynge Sisimiuniit aappaagu Italiami illoqarfimmi Torinomi Nunatsinni timersornerup oqaluttuarisaaneranut ilanngutissapput.
Sisoraaserlutik oqilaniuttartut taakku kalaallini siullersaallutik innarluutillit Special Olympics World Winter Gamesimi Danmark sinnerlugu unammissalutik. Taanna tassaavoq ineriartornikkut innarluutillit OL-qartinneqartarnerat.
Peqataanissaq oqaluttuarisaanermut ilannguttussaq illiniliunneqarpoq Nunatta Islandillu suleqatigiinnerisigut.
- Kalaallit Nunaat olympiademi ataatsimiititaliarsuarmi ilaasortanngilaq naalagaaffiunnginnerput pisstigalugu. Taamaattumik unammineerluta OL-mut peqataajartortitsisinnaanngilagut, Kalaallit Nunaanni sisorartartut kattuffianni allaffissornermi siunnersorti Majaq Heilmann KNR-mut oqarpoq.
- Maajimili Islandimut tikeraarneq periarfissanik ammaavoq Special Olympics World Winter Gamesimi Island marlunnik inissaateqarmat. Nunatsinnut taakku tunniunneqarnissaat Islandimiit kissaatigineqarpoq. Danmarkimili olympiademut ataatsimiititaliaq aqqusaarneqaqqaarpoq Islandimiut kissaatigimmassuk inissat taakku marluk tunniunneqarneranni Nunatsinnut tunniunneqarnissaat qulakkeerneqassasoq, qujanartumillu iluatsippoq, Majaq Heilmann oqarpoq.
Pisariuvoq
Jørna-Marie Larsen aamma Nuka Martin Lynge sisoraaserluni oqilaniunnermi Nunatsinni pissartanngorniuteqataasarput innarluutillit immikkut tassani unammisinneqartarmata.
- Peqataaniartunut piumasaqaatit sakkortupput. Taakku ilagaat ikorfartorteqarani sivisuumik kisimik angalasinnaanissaq, Majaq Heilmann oqaluttuarpoq.
- Soorunami aamma timersornermik sisoraaserlunilu oqilaniunnermik soqutigisaqareersunik nassaartussaanikuuvugut. Taakku marluullutik Nunatsinni pissartanngorniunnermi peqataasareerput nukappiararlu Arctic Circle Racemi peqataareernikuulluni, Jørna-Marie Larsenip aamma Nuka Martin Lyngep toqqarneqarneranni tunulequtaasunik Majaq Heilmann nassuiaavoq.
Ammaassisut
Ilanngullugu oqaluttuaraa timersortartut taakku marluk innarluuteqarnerat nakorsamit aamma uppernarsaaserneqartussaasimasoq.
Jørna-Marie Larsenip aamma Nuka Martin Lyngep Special Olympics World Winter Gamesimi allanut aqqutissiuussisinnaasoq neriuutigineqarpoq.
- Ilisimatinneqarnera naapertorlugu aatsaat siullerpaamik Special Olympics World Winter Gamesimi peqataasoqalerpoq. Neriuppunga siunissami Nunatsinniit peqataasarsinnaasunut tamanna ammaassisinnaasoq. Sisoraaserluni oqilaniunneq kisiat eqqarsaatiginagu timersuutinili allani aamma periarfissiisinnaanera eqqarsaatigaara, Majaq Heilmann oqarpoq.
- Taamaattumik aamma neriuutigaara Danmarkimi innarluutillit timersornermut kattuffiat qaninnerusumik suleqatigilerumaarlugu, naggasiivoq.
OL-mi naliginnaasumi 1968-miit kalaallit peqataasoqartarput taamanikkut Apollo Lynge sisoraaserluni oqilaniunnermi peqataammat.
