Timersorneq

Avannaata Qimussersua: Sukkaniuteqataasussat 28-t anngupput

Qimussimik sukkaniunnermi Nunatsinni unammersuarnissamut Avannaata Qimussersuanut anngunniunnerit naammassipput – siornalu pissartaq peqataanngilaq. Annguttut aqqi maani takukkit.

Allattoq Noah Mølgaard

marsip 10-at 2025 13:14

Sisimiuni Oqummiannguup tasia tusaamaneqaqqilluarumaarpoq arfininngorneq martsip 29-at.

Taannami taseq Nunatta qeqqani illoqarfiup silatinnguaniittoq 2023-misut Avannaata Qimussersuani aallarfiullunilu apuuffiussaaq qimussertartut 28-t katillugit 300-t sinnerlugit qimmeqartut sukkaniutilillarpata.

Aamma atuarukQimmit arlallit Ilulissani toqupput, nersutilli nakorsaat tuniluuttumik nappaasoqarnissaanik ilimasunngilaq

Anngunniunnerit amerlanerpaartaat arfininngorneq martsip arfineq pingajuat naammasssineqareersut paasinarsivoq ukioq manna nutaamik Avannaata Qimussersuaqalerumaartoq.

Aamma atuarukThomas Thygesen Avannaata Qimussersuinngorpoq

- Takusinnaasakka naapertorlugit siorna Avannaata Qimussersuini ajugaasoq Thomas Thygesen anngunnissaminut sekundinik marlunnguanik inuuttuulaarsimasoq. Allatut oqaatigalugu; nutaamik Avannaata Qimussersuanngortoqartussanngorpoq, Kalaallit Nunaanni Qimussertartut kattuffianni KNQK-mi siulittaasoq Mikkel Jerimiassen KNR-mut oqarpoq.

Ajugaassagatitaq taajuminaappoq

Taanna Avannaata Qimussersuanngortussatut ilimagisaasinnaasumik toqqaanissaminut tunuarsimaarpoq.

Avannaata Qimussersuanut 2025-mi annguttut

Upernaviup sukkaniuffiani:

Nr. 1 Paalu Kristensen Tasiusaq

Nr. 2 Aron Sakariassen Nuussuaq

Nr. 3 Aron Eskildsen Tasiusaq

Uummannap Kangerlua:

Nr. 1 Anton Street Saattut

Nr. 2 Miki Therkelsen Ikerasak

Nr. 3 Svend-Peter Petersen Saattut

Saqqaq/Qeqertaq:

Nr. 1 Markus Jensen Saqqaq

Nr. 2 Mikkel (Uno) Jensen Saqqaq

Nr. 3 Tittus Broberg Saqqaq

Qeqertarsuaq:

Nr. 1 Steve Broberg

Nr. 2 Ulloriaq Olsen

Nr. 3 Jonas Lukassen

Ilulissat:

Nr. 1 Henrik Jensen

Nr. 2 Minik Olsvig Svendsen

Nr. 3 Milan Mathæussen

Qasigiannguit sukkaniuffiani:

Nr. 1 Marius Steenholdt (Ikamiut)

Nr.2. Aputsiaq Johansen (Ikamiut)

Aasiaat sukkaniuffiani:

Nr. 1 Erneeraq Jeremiassen

Nr. 2 Poul Olsen

Nr. 3 Isak Siegstad

Kangaatsiap sukkaniuffiani:

Nr. 1 Bertel Wille (Niaqornaarsuk)

Nr. 2 Gert (Nuka) Frederiksen (Kangaatsiaq)

Nr. 3 Hans Aronsen (Kangaatsiaq)

Sisimiut:

Nr.1 Nukaaraq Olsen

Nr 2 Uno Bourup, nukarlersaasussaq (14 år)

Nr.3 Nukannguaq Knudsen

Nr.4 Marius inûsugtoq, angajullersaat (65 år)

Nr.5 Nuka Olsen

Pinngortitap sananeqaataa qimussillaqqilluinnartumut unamminarsinnaavoq ingerlaffiit ilai nerukitsumik aqquteqartarmata. Ilaruttoortoqarsinnaavoq minutserpassuarnik kinguarnermik kinguneqarsinnaasunik.

- Sukkaniuttartunut piareersimaffigissalugu tamanna pingaaruteqarluinnarpoq. Qimussertoq qimmillu suleqatigeeqqissaartariaqarput aammalu sukkaniuttut allat ataqqineqartussaallutik, Mikkel Jerimiassen oqarpoq.

Avannaata Qimussersuanut annguttut Sisimiunut assartornissaat KNQK-miit pilersaarusiorneqaleruttorpoq. Assartuinissap akisunera pissutaalluni sineriammi anngunniuffinniit pingasukkaarlutik anngupput Sisimiormiullu aaqqissuisutut tallimanik anngutsitaqarlutik.

- Malittarisassanik allassimavoq anngunniuffinni amerlanerpaamik tallimat anngussinnaasut. Allassimanngilarli tamatigut tallimaasariaqartut, Mikkel Jerimiassen nassuiaavoq.

Ukioq 2017-miilli ukiut marluk tulleriisillugit Avannaata Qimussersuani ajugaasoqarnikuunngilaq. Taamani Edvard Samuelsen Saattuneersoq 2016-mi 2017-milu ajugaasuuvoq.

Mikkel Jerimiassenip apersorneqarnera tamaat radiomi timersornermi ataasinngornermi ualikkut nalunaaqutaq 16.30-miit tusaaneqarsinnaavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.