Qimmit arlallit Ilulissani toqupput, nersutilli nakorsaat tuniluuttumik nappaasoqarnissaanik ilimasunngilaq
Avannaata Qimussersuanut anngunniunnerit aallartilersullu nersutit nakorsaannit quarsaarnartumik nalunaaruteqarput, taannaavorlu nersutit nakorsaannut oqartussaasoq.
Ilulissani qimmeqatigiinni ataatsini qimmit sisamat toqoreersut nersutit nakorsaat kajumissaarivoq Ilulissani qimmiutillit qimmiminnut alaatsinaaqqissaarnissaannut.
- Qimmit toquneranni ilisarnaatit najoqqutarissagaanni toqussutaat nerisaneersoorpasippoq, nersutit nakorsaat Asger von Wenck KNR-mut oqarpoq.
Avannaata Qimussersua aarlerinanngilaq
Siusinnerusukkut qimmit nappaalanersui Nunatsinni qimmit qimuttut akornanni pisarnikuupput nunaqarfiit illoqarfiillu ilaasa qimmiit tikinneqarlutillu aallaqqusaajunnaarallartarlutik.
Napparsimanerli nerisanik aallaaveqartoq tuniluunnavianngitsoq inuussutissalerinermut oqartussaniit eqqissisaapput.
Arfininngorneq martsip arfineq aappaanni Avannaata Qimussersuanut anngunniunnerit avannaa tamakkiusavillugu pisussaapput.
Tamanna aamma Ilulissani pissaaq 16-nit peqataaffigineqartumik. Aallarfissami Narsarsuarmi qimmit 200-ngajaat arfinngornermi ullup qeqqani katersuutissapput. Avannaata Qimussersualu martsip 29-at Sisimiuni pilerpat qimmit 300-ut missaat sineriammiit Sisimiunut tikiunneqassapput.
Qimminik toqungasunik Ilulissani siumuisoqaraluartoq nersutit nakorsaat eqqissisaavoq.
- Maanna ilisimasavut najoqqutaralugit tuniluuttumik napparsimasoqarpasinngilaq, taamaattumik Avannaata Qimussersua pilersaarutit malillugit pisinnaavoq, Asger von Wenck oqarpoq.
