Sulorarneq: Julian Arlethip ketcherini Malaysiami aalatippaa
Sulorarnermi pooqattaq 30-nik kiattumi isugutarujuttumi Malaysiami illoqarfissuarmi Kuala Lumpurimi poortorneqarpoq. Tassani avatangiisit sungiusariaatsillu Nuummi sungiusimasanit allaaneroqaat.
Tassaana 19-nik ukiulik Julian Arleth Nuummeersoq Nunarput sinnerlugu nunanut allanut unammisartoq, Malaysiami unammilligassarsiortoq.
- Isumassarsiaq pilerpoq novemberip qaammataani Small Nations Cupimi peqataanitsinni nuna tamakkerlugu sungiusaasoq oqaloqatigigakku suna aqqutigalugu inerisaqqissinnaanerlunga, Julian Arleth KNR-mut oqaluttuarpoq.
- Tassani isumaqatigiissutigaarput malunnaatilimmik nikeriaqqissaguma Nuummi pisinnaanngimmat allamukartariaqartunga. Sungiusaasutta aamma ikiorluaqaanga nunani tamalaani ilisarisimasarpassuaqarami – aamma Malaysiami. Tassani peqatigiiffiit ilaanni sungiusaqataasalernissannut ikiorluaqaanga, Julian Arleth Kuala Lumpurimiit oqarpoq.
Sungiusaasoq naveersisoq
Sulorarnermi Malaysia nunarsuarmi siuarsimanerpaat ilagaat unammisartoqarluni nunarsuarmi kakkannerpaat ilaannik, tamannalu sakkortuumik sungiusariaaseqarnikkut anguneqarpoq.
Julian Arleth sungiusarnermi aamma qajassuunneqanngilaq.
- Maannamuugallartoq qasujanerartillunga naveersittarpunga. Sungiusaasugissaaqaagut pitsaanerpaamik angusaqarnissara pillugu uannut toortaasinnaasumik, Julian Arleth oqarpoq.
- Kalaallit Nunaanni unammigaangama isumaqartaraluarpunga qasujaallunga. Maanna maanga pigama paasivara maani allat inissisimanerannut sanilliullugu qasujaqalunga, Julian Arleth oqarpoq, naatsorsuutigaalu suli qaammatit arlallit Malaysiamiikkallassalluni.
Pikkorinnerit ilagaat
Ukioqqortunngikkaluarluni ukiut kingulliit sulorarnermi Nunatsinni pikkorinnerit akornanniippoq, maannali malugaa sungiusariaaseq allarluinnaq peqataaffigilerlugu.
- Assorujussuaq pikkoripput. Inuusuttuaraq 16-nik ukiulik peqatigiiffimmi sungiusaqataasartoq Malaysiap nunanut allanut unammisartuinut toqqagaavoq, Julian Arleth oqaluttuarpoq.
Malaysiamiinnini maannamut nammineq aningaasalersorpaa.
