Ajugaaneq oqaluttuarisaanermut ilannguttoq: Sulorarnermi arnat ataasiakkaarneranni ajugaasoq

Inuiattut erinarsuupput marloriarluni appinneqarpoq sulorarnermi Island Gamesimi Guernseymi pisumi unamminerit julip qeqqani naammassimmata.

Siullermik Jens Frederik Nielsen Nuummeersoq kultinnammat aappassaannillu Sara Lindskov Jacobsen kalaallini arnani siullersaalluni kultinnammat.

- Misigisaq pikkunaqaaq. 2011-mili peqataasalerpunga 17-unnguatsiartunik ukioqarlunga. Angorusuttuaannarpara arnani unammimik angerlaassinissara, Sara Lindskov Jacobsen KNR-mut oqarpoq.

- Arfinilissaat misiliinermi iluatsimmat assorujussuaq nuannaarpunga. Ataqqinaat angeqaaq, oqarpoq.

Finalemi Isle of Manimeersoq Jessica Li ajugaaffigaa 21-14 aamma 21-11-mik.

Savalimmiormioq pissangatsitsivoq

Sara Lindskov Jacobsen iligiittut unamminermi finalemi ajugaaffigisaminut ajugaavoq taamalu finale sioqqullugu eqqissisimalluni.

- Ilimanarpoq semifinalemi pissanganerusunga. Tassani Savalimmiuneersoq iligiittut unamminermi ajorsarfigisara unammivara. Taamaattumik eqqarsartaatsikkut unammineq taanna ajornakusoornerpaatut inissisimagunarpoq, Sara Lindskov Jacobsen semifinalemi Savalimmiuneersumut Miriam Í Grótinumimut ajugaanilersaarpoq.

Sulorarnermi unammeriaatsit assigiinngitsut atorlugit unammisoqarpoq. Iligiittut unammineq kalaallit 2019-mi ajugaaffigisaat Savalimmiormiut ajugaasuuffigaat kalaallit sølvinnattut.

Unammisitsilluarput

Unammersuartitsinerlu ataatsimut isigalugu kalaallit kultinnattortaata pitsaasumik eqqaarusuppaa.

- Ilimanarpoq Island Gamesimi unammeqataaffigisimasanni nuannernersaasoq. Assut pilersaarusiorluagaavoq inuillu inussiarneqalutik. Taamaattumik misigisaq nuanneqaaq, Sara Lindskov Jacobsen oqarpoq.

Angutit ataasiakkaarneranni Jens Frederik Nielsen aamma kultinnappoq. Taamaasilluni angutit ataasiakkaarneranni sisamassaa angutit Nunatsinneersut ajugaasortaqarput.

Bror Madsen Ilulissaneersoq Nunatsinneersuni siullersaalluni 2005-mi kultinnappoq. Frederik Elsner Nuumeersoq 2007-mi aamma 2009-mi kultinnappoq.

Island Games tulleq Skotlandip eqqaani Orkneymi pissaaq.