Island Games: Jens-Frederik Nielsen ilimaginngisaminik guldinnattoq
Timersortartut Europami, Atlantikup Kujataani Caribiamilu qeqertani inuiaqatigiinni inukitsuneersut qeqertami Tuluit Nunaannut atasumi Guernseymi unammersuaqqammerput. Nunatsinneersut timersortartut 40-t missaanniittut peqataapput.
32-nik ukiulik Jens-Frederik Nielsen Island Gamesimi angutini sulorarnermi naatsorsuutiginngilluinnakkaminik tallimanngormat pissartanngorpoq.
- Naatsorsuutigisimanngiivippara ajugaassallunga aamma unamminerup kingullerpaap ingerlanerani aamma taanna naatsorsuutiginngilara, kisianni qujanartumik iluatsippoq, Jens-Frederik Nielsen oqarpoq.
Pissartanngortoq ukiut 20-t missaanni sulorartarnermik misilittagaqarpoq, ukiullu 14-t missaanni nunanut allanut unammisartutut misilittagaqarluni. Guldimillu ukioq manna angerlaassinissani naatsorsuuteqarsimanngikkaluarnera peqquteqarpoq.
Jens-Frederik Nielsenimi sulorartarnerup saniatigut politikeriuvoq nuimasoq, partiimi Demokraatini siulittaasuulluni.
- Soorunami ulapittuugama ataataallungalu ilaqutaallungalu ilaatigut sungiusarniarneq sakkortusarpoq artornartarpoq, kisianni pilliuteqarneq taanna sungiusartuarneq. Aamma ilaatigut immaqa ulloq oqimaakkaluartoq attanniarsaralugu, Jens-Frederik Nielsen nassuiaavoq.
Angusat naammaginartut
Island Games ukiut marlukkaarlugit ingerlanneqartarpoq, coronali peqqutigalugu 2019-mi kingullermik aaqqissuunneqarluni. Nunatsinneersut timersortartut Island Gamesimut ukioq manna peqataasut ujammit katillugit arfinillit angerlaappaat.
Ujammit 2019-imi angerlaanneqartut arfineq-pingasuusut. Tassunga tunngatillugu Timersoqatigiit Kattuffianni siulittaasoq Bolethe Stenskov naliliivoq.
- Soorunami pitsaanerusinnaagaluarpoq, kisianni sapinngisannguarput tamaat aallaavigalugu unammipput. Assersuutigiinnaavillugu badmintonimiit guldit marluk tiguarput, kingullermi ataasiinnaasoq. Taamaattumik tassuunatigut aamma takutiinnarpaa piareersarluarsimaneq, Bolethe Stenskov oqarpoq.
Island Gamesimiillu saqqarmiut angerlaanneqartut ukioq manna ikinnerunneri peqqutissaqarnerarlugu.
- Nunat allamiut taakku unammeqataat taakkua ukioq naallugu namminneq unammiuaarsinnaatitaanikuupput aamma misileraanikuupput unammeqattaartarlutik, nunatsinnili uagut timersortartuutigut taama periarfissaqarnikuunngillat, Bolethe Stenskov nassuiaavoq.
Jens-Frederik Nielsen pissartanngornissaminik naatsorsuuteqarani pissartanngorami killitsisimaarpoq.
- Nuannaarneq taanna pilluarneq marloriaatinngortippaa immaqa. Assorujorujussuaq nuannaartitsivoq. Aamma naatsorsuutigisamanagu taamatut ingerlalluarluni tamatigut nuannernerujuaannarpoq, Jens-Frederik Nielsen oqarpoq.
Island Games 2023-mi sulorarnermi arnat ataasiakkaarneranni nunatsinneersoq 29-nik ukiulik Sara Lindskov Jacobsen pissartanngorpoq. Island Gamesimi timersuutit assigiinngitsut arfineq-marluk nunatsinniit peqataaffigineqarput.
Island Games Skotlandip qeqertaasa ilaanni Orkneymi 2025-mi tulliani ingerlanneqassaaq.
