Sulisut nukissaaruttut: Utoqqaat Illuat Sullivinnik Nakkutilliisoqarfimmit pitsaanngorsaaqquneqartoq
Nuummi Utoqqaat Illuanni sulisut sulerulummata eqqiaasutut sulisut suliassatik unitsillugit najugaqartunik paaqqutarinnittariaqartarsimapput.
Sullivinnik Nakkutilliisoqarfiup nalunaarusiaani KNR-ip pissarsiarisaani tamanna erserpoq.
Nuummi Utoqqaat Illuanni sulisut ilaat akunnerit suliffiusartut 80-it sinnerlugit, tassa akunnerit 40-t 50-illu akornannik qaangiuttoorlutik sapaatit akunneri marluk ingerlaneranni akunnerit 130-t missaanni sulisartut, nalunaarusiami allaqqavoq. Utoqqaat Illuanni atorfillit qaangiuttoorlutik sapaatit akunneri tamarluinnangajaasa suliffiusussat marloriaataannik sulisariaqartarput. Utoqqaat Illuanni sulisussaalatsineq peqqutaalluni tamaani aqutsisut ullut tamarluinnangajaasa sulisussarsiortariaqartarput.
Amigartumik pitsaaliuineq Utoqqaat Illuanni sulisut uippakajaarnermik uippakajaarnermillu aallaavilimmik soorlu siooranermik, isumatsassimaarnermik uummallunnermilluunniit nappaateqalernissamut qaninnerulersartut nalunaarusiami atuarneqarsinnaavoq.
Qasullutik nukissaaruttut
Sulisut angummanniarsariuaraluarlutik sulerulummata tamaani najugallit uffarneqanngitsoorsimasortaqarsinnaasartut, Utoqqaat Illuata pisortaa ilisimatitsivoq. Sulilerlaanik ilinniartitsinissamut ilaanni aamma piffissaalatsisarput.
Utoqqaat Illuanni sulisut qasutallutik soraartarput. Aamma sulerulunnertik peqqutigalugu napparsimallutik sulinngitsuukulasarput.
Pissutsit tamakku pitsanngorsaaqquneqarneranut peqqutaaqataapput.
Kommuneqarfik Sermersooq Utoqqaat Illuanni sulisut sulerulunnermik peqqissutsimikkut innarlerneqaateqalinnginnissaannik qulakkeerisussaavoq. Kommunilu ajonarnartorsiutinik novembarip 30-at nallertinnagu aaqqiinissamut piffissalerneqarpoq.
Utoqqaat Illuanni sulisut sulerulunnerat arajutsisimanagu, Kommuneqarfik Sermersuup Utoqqarnik Sullissiviata ingerlatsisua Karen Lund Mølgaard oqarpoq.
Utoqqaat Illuanni najugallit uffarneqartannginnerat naammaginarpa?
- Naagga. Taamaammat Utoqqaat Illuanni najugallit tamaani sulisut sulerulunnerannit eqqugaannginnissaat qanoq iliuuseqarfigisariaqarpoq. Sulisussaalatsinerli ilinniarsimasunillu sulisukinneq tamatuma qanoq iliuuseqarfiginissaanut inorsartitsipput, taanna oqarpoq.
Kingoraartaannerunissaat pisariaqartoq
Utoqqaat Illuanni sulisut ilaat sapaatit akunnerit marluk ingerlaneranni akunnerit 40-t 50-illu akornanni qaangiuttoorlutik sulisariaqartarnerat naammaginarpa?
- Naagga, naammaginanngilaq. Ingammik Utoqqaat Illuata aqutsisuinut sulisuinullu. Taamaammat ilinniarsimasunik sulisussarsiuleruttorpugut, Karen Lund Mølgaard oqarpoq.
Kommuneqarfik Sermersooq atortussamaatinik Utoqqaanni Illuata sulisuinut oqilisaataasinnaasunik pisiortuleruttortoq, Karen Lund Mølgaard ilisimatitsivoq. Aamma Utoqqaat Illuanni immikkoortortani sulisut ikioqatigiinnerunissaat kingoraartaannerunissaallu pisariaqartoq, taassuma aamma oqaatigaa.
Taava imaappa, sulisut sulerulunnertik qaangiuttoorlutillu sulisarnertik naammaginnarallartariaqarpaat?
- Aap, tassa ajoraluartumik taamaappoq, Karen Lund Mølgaard oqarpoq.
Utoqqaat Illuani najugallit sulisullu akunnerminni pisartut aallaavigalugit pitsanngorsaaqqusisoqarpoq. Sulisummi ilaat suliassamik ilaannut sapiuttarput.
Sulisut timikkut tarnikkullu persarineqarsimasut ilaat qissasiinnartarsimapput.
Sulisut ikorfartorneqarnerat oqaloqatigineqartarnerallu, najugallit ilaannik sullissinermi sunniuteqarsimanngitsut tamannalu sulisunut inuttut annertuumik kingunerluutigisaraat, nalunaarusiami aamma allaqqavoq.
Sulisut suliffimminni suliatik iperarnaveerlugit angerlarsimaffimmut kalittarpaat, pisuusutut misigisarput, sinnarliortarput, sioorasarput qanorlu iliuusissaaleqisarlutik.
Utoqqaat Illuanni sulisut oqaloqatigeeriaatsimik aalajangersimasumik atuinermik tarnikkullu ikiorsiineq pillugit pikkorissassasut, Kommuneqarfik Sermersooq pitsanngorsaaqquneqareernermini ilisimatitsivoq. Tamatuma saniatigut Utoqqaat Illuanni najugallit ilaata paaqqinniffimmut naleqquttumut nuutsinnissaa aaamma sulissutigineqaleruttorpoq.
Utoqqaat Illuanni najugalik alla nakuusertarnini sioorasaarisarninilu pillugit oqaloqateqarluni katsorsartereernermini siumut saakkiartormat aarlerinarunnaartutut kommunimit nalilerneqarpoq.
Kommuni utoqqatsertariaqartoq
Utoqqaat Illuanni sulisut timikkut tarnikkullu innarlerneqarnerat pinngitsoortinneqarsimasinnaagaluarnersut Karen Lund Mølgaard aperigatsinni ima akivoq:
- Najugalik innarliisimasoq aallaqqaataaniilli naleqquttumi paaqqinnittarfimmiitinneqarsimagaluarpat pinngitsoortinneqarsimasinnaagaluarpoq.
Kisiannimi taamaaliunngilasi. Tamatumunnga kina akisussaasuua?
- Kommuneqarfik Sermersooq, allamik naamik.
Kommuni tamanna pillugu utoqqatsertariaqarsoraajuk?
- Aap... Aallaqqaataaniili qanoq iliuuseqarsimagaluarpat, sulisut taama nalaataqarsimanavianngikkaluarput.
Utoqqaat Illuanniilersussat nuunnissaminnut sioorassappata paasisinnaavigit?
- Aap, paasisinnaavakka. Ajornartorsiulli imaannaanngitsutut isigaarput, pitsanngorsaanissarpullu soorunami sulissutigaarput, Utoqqarnik Sullissiviup ingerlatsisua oqarpoq.