Ombudsmandip Kommune Kujalleq isornartorsiungaatsiaraa: Angut akuersitinnagu paaqqutarineqarluni angerlarsimaffimmut inississimagaat

Kommune Kujalliup angut akuersitinnagu paaqqutarineqarluni angerlarsimaffimmut inississimagaa ”isorisariaqarluinnarpoq”.

Ombudsmandip isornartorsiuinera taama nipeqarpoq, Ombudsmandilu isumaqarpoq kommunip 2020-mi angutip angerlarsimaffianiit paaqqutarineqarluni angerlarsimaffimmut nuutsinniarlugu piaaraluni salloqittarsimagaa.

Ombudsmandip isornartorsiuinera naapertorlugu angutip puiguttortuunera pissutaalluni Kommune Kujalliup paaqqutarineqarluni angerlarsimaffimmut inissikkusussimavaa. Tamassuma siornatigut angut kisimiilluni najugaqarsimavoq.

Paaqqutarineqarluni angerlarsimaffimmulli angut inissinneqartussanngormat angutip nuunnissani kissaatigisimanngilaa. Taamaammat angut pineqartoq oqarfigisimavaat utoqqaat illuannut feerialernerarlugu.

Tamanna utoqqaat illuanni angut feeriarniartutut isumaqalersillugu salloqittaaneruvoq, ombudsmandi taama isumaqarpoq. Pineqartorpiarmi unaasimammat angut paaqqutarineqarluni angerlarsimaffimmi ataavartumik najugaqalissasoq kommuni aalajangiisimasoq.

- A-p (angutip, aaqq.) Y-mi (illoqarfiup aqqa, aaqq.) qularnanngitsumik utoqqaat angerlarsimaffiannukarusussimannginneranik nalilerpara. Kommunillu A feerialernerarlugu salloqittarmagu A aatsaat malinnaarusulersimavoq, isornartorsiuinermi taama allassimavoq.

Tamanna ilutigalugu suliap ingerlasimaneranik kommunip uppernarsiisinnaasimannginnera ombudsmandip aamma isornartorsiorpaa.

Taamaasilluni kommunip paasitinneqarsinnaatitaaneq pillugu inatsit tunngavigalugu allattuisussaatitaanerminik eqqortitsisimanngilaq.

Inatsisit tamatigut malinneqarneq ajortut

Kommune Kujallermi kommunaldirektørip, Tine Parsip, ombudsmandip isornartorsiuinera akueraa.

- Isornartorsiuineq tunngavigalugu kommunip qanoq iliuuseqarniarneranut ombudsmandi akissutissarsinerussammat suliaq qulaajarlugu aallartissimavarput, Tine Pars KNR-imut taama oqarpoq.

Sooruna kommuni angummut pineqartumut eqqunngitsunik paasissutissiisimasoq?

- Suliaq aalajangersimasoq taanna oqaaseqarfiginianngilara. Oqaaseqarnissannut tunngavissaqanngilanga, inummut ataasiakkaamut suliaammat oqaaseqarfigerusunngilara, Tine Pars oqarpoq.

- Kisianni oqaatigisinnaavara taamanikkut 2020-mi suliap ingerlanerani aamma ullumikkut isumaginninnermut siunnersortitut ilinniarsimasunik sulisussaaleqinerput sulisoqaannarnissarpullu ajornartorsiutigigatsigu. Tamannalu isumaqarpoq uppernarsiisarnerit akuersisarnerillu pillugit malittarisassat tamatigut malinneqartannginnerannik, kommunaldirektøri oqarpoq.

Tamanna ilutigalugu suliaq pillugu naammattumik uppernarsiisoqarsimannginnera pillugu ombudsmandip isornartorsiuinera Tine Parsip akueraa.

Sulisunik pikkorissaanissaq

Taama isornartorsiuisoqarneranut ilinniarsimasunik sulisussaaleqineq pissutaaqataasoq, kommunaldirektøri isumaqarpoq.

- Isumaginninnerup iluani ilinniarsimasunik sulisoqannginneranik ajornartorsiut tamanna nalinginnaasuuvoq, taamaammat nakkutilliinerup nukittorsarneqarnissaa anguniarparput, Tine Pars oqarpoq.

Taassuma ilisimatitsissutigaa uppernarsiisarnermik amigaateqartoqarnera aaqqiiviginiarlugu kommuni iliuusissanik aallarniisimasoq.

Iliuuserisassat ilagaat pissaanermik atuisarneq pillugu inatsimmi malittarisassanik malinnittarneq pillugu sulisunik pikkorissaanissaq kiisalu kommunimi inatsisilerituumik nakkutilliisussamik atorfinitsitsinissaq.