Ukiorpassuarni suliarinninneq: Ombudsmandip isorilluinnaraa

Ombudsmandi, Vera Leth, qajassuussinngilaq.

Avannaata Kommunia innuttaasumik ilaannik sullissinera isornarluinnartoq, taanna isumaqarpoq.

Tassa pensionisiaqaliaarnissamik qinnuteqaammik ukiut pingasut sinnerlugit ilaginnaaneq ingerlatsinermi ileqqorluttuliornerummat isornarluinnarneraavoq. Suliamik sapinngisamik piaartumik illersorneqarsinnaasumillu aallartitsisoqartartussaasoq, taanna erseqqissaavoq. 

Suliamili tassani taamaaliortoqarsimanngilaq.

Aallartinniarusaaraat

Avannaata Kommuniata innuttaasumik ilaata pensionisiaqaliaarnissamik 2018-imi aggustimi qinnuteqaataa ilaginnarsimavaa. Innuttaasorlu taanna qinnuteqaamminik kommunimut aatsaat nukingisaaruteqarmat ataatsimeeqatiserineqarpoq.

Innuttaasoq taanna nakorsap allagaanik siornatigut pissarsereeraluarluni tunniussereeraluarlunilu taamaalioqqeqquneqarsimasoq, allagaammi erserpoq. Tamanna kommunip nakorsap allagaanik immikkoortortamut suliarinnittussamut ingerlatitseqqiisimannginneranik peqquteqarpoq. 

Innuttaasup taassuma pingajussaanik nukingisaarinera aamma iluaqutaanngilaq. Taannami 2022-mi septembarimi aappassaanik nukingisaarereersoq ataatsimeeqatiserineqaqqissimagaluartoq suliaq taanna suli ilaginnarneqarsinnarpoq. Nakorsammi allagaanik nutaamik tunniussissasoq kommunip kimigiisiutigaa. 

Qinnuteqaataa 2022-mi decembarimi suliarineqalerpoq. Innuttaasorlu taanna pensionisiaqaliaarnissamik qaammammi tassani nutaamik qinnuteqarpoq.

Aalisarnermut allagartaqartilluni pensionisiaqaliaalersinnaanngitsoq suliarinnittup ukiup massuma aallartinnerani ilisimatimmani qinnuteqaatini imminiiginnarpaa.

- Isornarluinnarpoq

Avannaata kommunia innuttaasup taassuma qinnuteqaataanik ataasiaannarnani ilaginnaasimasoq suliamillu taassuminnga qinnuteqartoq arlaleriarluni aatsaat nukingisaarereersoq aallartitsisimasoq, Ombudsmandi inerniliivoq.

Vera Lethilu nangippoq:

- Kommuni suliamik taassuminnga ukiunit pingasunit ikinnerunngitsuni ilaginnaasimanera qinnuteqartorlu aatsaat nukingisaarereermat aallartitsisimanera isornarluinnarpoq.

Tassa ukiunit sisamanit ikinngerunngitsuni suliarinnissimaneq, Omdusmandip isorilluinnarpaa.

Avannaata Kommuniata isornartorsiut tusaatissatut tigunerarpaa, taamatullu pisoqaqqissanngitsoq erseqqissaatigalugu.

Aviâja Madsen Ingerlatsinermut ilaqutariinnullu tunngatillugu pisortaq allakkatigut taama nalunaarpoq.

- Akuerineqarsinnaanngilaq ajuusaarnaqaarlu suliaq sivisoorujussuarmik ingerlasimammat, taanna oqarpoq.

Taanna aamma erseqqissaavoq, innuttaasunut sullissinermi suliat taamak sivisutigineq ajortut.

- Avannaata kommuniata sulissutigaa, innuttaasut pitsaanerpaamik sullinneqarnissaat, Ingerlatsinermi Ilaqutariinnullu immikkoortortaqarfimmiit kommunalbestyrelsemut paasissutissiissutigissavarput taamaattoqaqqissanngitsoq, Aviâja Madsen oqarpoq.