Paul Watson tigummigallarneqaannassasoq

Nunatta Eqqartuussiveqarfiata 73-inik ukiulik avatangiisinik illersuiniaq Paul Watsonip Novembarip ulluisa 13-ata tungaanut tigummigallarneqaannarnissaa aalajangerpaa.
Assi © : KNR / Johasinnguaq Olsen
Allattoq Ulrikke Andersen
oktobarip 23-at 2024 12:54

Oqaluttuaq uteqqippoq. Nunatta Eqqartuussiveqarfiata, pingasunngorneq oktobarip ulluisa 23-ani, Paul Watson tigummigallarneqaannarnissaa aalajangerpaa. 

Siuliattuulli sapaatit-akunnnerit pingasunik tigummigallarneqarnera sivitsorpoq, taamaalilluni ullut 21-it pineqaatissinneqarsimasunut inissiisarfimmeeqqissalluni.

Atavatangiisinik illersuiniaq, Novembarip ulluisa 13-ani sassarteqqinneqaqqissaaq.

PAUL WATSON NAATSUMIK

  • Canadami Torontomi 1950-imi decembarip aappaani inunngorpoq.
  • Avatangiisinik illersuiniaqatigiiffimmik Greenpeacemik 197-imi pilersitseqataasuuvoq. Tassanngali 1977-imi anivoq.
  • Immap uumasuinik immamilu uumassusillit ataqatigiiaarnerannik illersuiniaqatigiiffimmik Sea Shepherd Conservation Societymik tamatuma kingorna 1977-imi pilersitseqataavoq.
  • Sea Shepherds pillugit piviusulersaarusiami nangeqattaartumi "Whale Wars"-imi pingaarnertut inuttaasunut ilaavoq.
  • "Avatangiisinik 1900-kkunni illersuiniallammaat 20-t ilaattut" amerikamiut atuagassiaasa ilaannit Time Magazinemit 2000-mi toqqagaavoq.
  • Atuakkiai ilaatigut makkuupput: "Ocean Warrior" aamma "Earthforce!",  imalu oqaasinnaaqarnini aamma ilisimaneqaatigaa: “If the oceans die, we die” (imarpiit uumassuseeruppata, uagut toqussagut, (aaqq.))

Watsonip tunniunneqarnissaa pillugu aalajangiisoqassappat, pineqartoq najuuttariaqartoq, unnerluusisussaatitaasut pisortaat Mariam Khalil Watsonip tunngavilersuutigigaa, Kalaallit Nunaata Politiivi tusagassiuutinut nalunaarummi allapput. 

2010-mi sikuiutsumi kujallermi pisoq pissutigalugu Watson tunniunneqassasoq eqqartuussivimmullu sassartinneqassasoq Japanimi tigusarinninnissamik noqqaassuteqarneq  Watsonip tigusarineqarnera tunngaveqarpoq.

Watson tigummigallagaassaaq, Watson Japanimut tunniunneqassanersoq, Danmarkimi inatsiseqarnermut ministereqarfiata aalajangiiffiginissaata tungaanut. 

Suliareqqitassanngortippaa

Watsonip illeruisua, Finn Meinel, nunatta eqqartuussisuuneqarfimmut suliareqqitassanngortippaa. Erngertumik taamaaliortoq, Sermitsiaq.ag allappoq.

Umiarsuaq 26-nik inuttaqartup Nuummut orseriartorneqarnerani julimi Watson tigusaavoq.

Sivikitsumik Nuummiittussaalluni nunat allat soorlu  Frankrig, Schweiz, Irland aamma USA-mut ajornartorsiuteqarani angalareersimalerpoq. Maannali qaammatini pingauni allannguuteqarallarunanngitsumik Nuummiilerpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk

Politiit blok 5-imi toqutsisoqarneranit: Tusatsiakkanik ingerlatitseqqiineq kusanaappoq

Takornariarpassuaqalernissaa: Ilulissani unnuiffissat susoqaraluarpalluunniit amigaataalissasut

Naalakkersuisumik sisamassaa uppisitseriarneq pingitsoortitaasoq