Inatsisartut Ombudsmanditaalertut

Allamik sivikitsumik Ombudsmandissarsioreerluta atorfik taanna inuttassarsivarput. 

Inatsisartut tusagassiorfinnut taama nalunaarput. 

Gedion Jeremiassenip 1996-imili Ombudsmandiusoq, Vera Leth, 2023-mi aggustip aallaqqaataani paarlassavaa.

61-inik ukiulik Gedion Jeremiassen Københavns Universitetianit cand.jur.-iusoq namminersortutut ullumikkut inatsisilerituujullunilu nammineq aningaasartuutiginngisamik eqqartuussissutilerisuuvoq. Ombudsmandissaq Inatsisinut Ataatsimiititaliap innersuussutaa malillugu aamma Suleriaaseq pillugu Ataatsimiititaliap, Inatsisartuni partiinit tamanit ilaasortaaffigineqartuusup, peqataaneratigut toqqagaavoq.  

Gedion Jeremiassenip nunatsinni eqqartuussiveqarnermi inatsisilerituutut naammassisai misilittagartuujuneralu toqqagaaneranut tunngaviusut, Inatsisinut Ataatsimiititaliap siulittaasua Anders Olsen oqarpoq:

- Innarligassaanngitsumik isummertaaseqartutut, siammasissumik misilittagaqartutut, inuttut malunnaateqartutut, illoqarfinnillu nunaqarfinnillu annertuumik ilisimasaqartutut ataatsimiititaliap qinnuteqartoq isigaa. Atorfinitsitsiniarnerup ingerlanerani Ombudsmandeqarfimmut annertuumik ataqqinnissuseqarnini kiisalu Ombudsmanditut atuuffiup ineriartornissaanut takorluukkani ersersippai, Anders Olsen taama oqartoq tusagassiorfinnut nalunaarummi allaqqavoq.

Taassumalu Inatsisartut 1996-imili Ombudsmandiat, Vera Leth, aamma qutsavigaa. 

- Piffissaq manna iluatsillugu Inatsisinut Ataatsimiititaliamut siulittaasutut taamatuttaaq Inatsisartut ullumikkut Ombudsmanderisaat, Vera Leth, atuuffimmik ukiorpassuarni isumaginnissimaneranut qujassuteqarfigerusuppara.

Gedion Jeremiassen nunatsinni Ombudsmanditut toqqagaasuni pingajussarissavaat. Vera Lethip nunatsinni Ombudsmandinini siulleq, Emil Abelsen, paarlappaa.