Ombudsmandi naalakkersuisoqarfimmut sakkortoorujussuarmik isornartorsiuisoq: Ernumanartuuvoq

Aalisarnermut piniarnermullu naalakkersuisoqarfik inatsisikkut tunngavissatut atuussinnaassuseqanngitsumik itigartitsivoq.

Ombudsmandi, Vera Leth tusagassiuutinut nalunaaruteqarluni inerniliivoq.

Aalisarnermut piniarnermullu naalakkersuisoqarfiup ataatsimoorluni tikaagullittassiissutinut 2022-mi novembarimi qinnuteqaataa itigartitsissutigaa.

Naalakkersuisoqarfiup itigartitsinini ataatsimoorluni tikaagullittassiissutinut Naalakkersuisut piffissaq eqqarsaatigalugu killilersuisoqarnissaanik 2021-mi decembarimi atuutilersitsinissamut aalajangernerat tunngavilersuutitut innersuussutigaa.

Naalakkersuisoqarfiup ombudsmandip misissuineranut atatillugu naalakkersuisoqarfiup Naalakkersuisut aalajangiinerat inatsisitikkut tunngavissatut atuussinnaassuseqartutut isigigaat paasissutissiissutigaa.

Aalajangiinermili tassani ombudsmandip naalakkersuisoqarfik isumaqatiginngilaa.

- Naalakkersuisut aalajangernerat tikaagullittassinneqarnissamik qinnuteqartumut itigartitsinermi inatsisikkut tunngavittut atuussinnaassuseqarsinnaanngilaq. Aalajangernerup taamaattup inatsiseqartitsineq atuuttoq tapertalersinnaanngilaa taarsersinnaanaguluunniit. Tamanna Naalakkersuisoqarfimmut taamani 2021-mi aamma oqaatigaara. Taamani Naalakkersuisoqarfik isumaqatigalunga oqarpoq, suliallu tassunga attuumassuteqartut tamaasa suliareqqillugit, Vera Leth tusagassiuutinut nalunaarummi oqarpoq.

Kukkussutigeriikkamik kukkussuteqaqqittoq

Naalakkersuisullu kukkussummik nassuerutigeriikkaminik kukkussuteqaqqinnera akuersaarneqarsinnaanngitsoq, Vera Leth oqarpoq.

- Naalakkersuisoqarfiup kukkunermik siusinnerusukkut nassuerutigisimasaminik kukkussuteqaqqinnera ernumanartuuvoq ajornartorsiuterujussuullunilu. Uanga paasinninnera unaavoq Naalakkersuisoqarfiup aqutsinini inatsiseqartitsineq atuuttoq Inatsisartunit akuerineqarsimasoq tunngavigalugu tamatigut piareersartartussaagaa, tamannali suliami matumani pisimanngilaq, Vera Leth oqarpoq, nangillunilu:

- Naalakkersuisoqarfik ataatsimoorluni tikaagullinniarnerup piffissaq eqqarsaatigalugu killilerneqarnissaanik kissaateqaruni nalunaarut nutaarluinnaq aalajangersarsimasariaqaraluarpaa, tamannalu pillugu malittarisassat atuuttut tunngavigalugit tamanut saqqummiussimasariaqaraluarlugu. Naalakkersuisoqarfik taamaaliornissaminut periarfissaqarsimavoq, piginnaatitsissutitut aalajangersakkamik taaneqartoq suliassaqarfimmi tassani inatsimmi atuuttumi pioreersoq tunngavigalugu, Ombudsmand Vera Leth naggasiilluni oqarpoq.

Suliami annertunerusumi kukkussuteqartoqarsimallunilu sumiginnaasoqarsimasoq naliliivoq, taamaammallu Inatsisartut Inatsisinut Ataatsimiititaliaat Naalakkersuisullu oqaaseqaammik nalunaarfigai.