Toqusut pequtai innuttaasut utoqqaat illuannut najugaqarfinnulluunniit nuunnissaraluannik unitsitsisut

Utoqqaat illuinut, utoqqarnut najugaqatigiinnut najugaqarfinnulluunniit utaqqisoqartarnera nalinginnaavoq - aamma Kommuneqarfik Sermersuumi. Taamaattorli kommuni nuanniitsumik paasisaqarsimavoq. 

Tassami najugaqartup nalaasaarfia siniffialu, nerinermi atortut inimilu nerrivik inuttaata toqoreerneranit ukioq ataaseq sinnerlugu pujoralaffigitiinnartarnerat siumorneqartarsimavoq. 

Tamannalu pissutigalugu najugaqartussaq nutaaq isertersinnaasanngilaq. 

Ineeqqat inigineqaratik pequtallit ilaatigut qanigisaasut kingornussassat pillugit isumaqatigiissinnaannginnerannik pissuteqartarput.

Eqqartuussiviup aalajangiiniarnera sivitsortoorsinnaasarpoq tamannalu utoqqaat inuillu innarluutillit ineeqqamut utaqqisuniittut utaqqinerannut sivitsorsaataasarpoq. Qanigisaasut nunani illoqarfinniluunniit allaniittut piffissaagallartillugu ineeqqamik imaajaajartorlutik tikinniarnerat aamma ajornakusoorsinnaavoq. 

Utaqqisuniittut ikilisinneqarsinnaasut

Ajornartorsiut Isumaginninnermut Suliffeqarnermullu Ingerlatsivimmit iliuuseeqarfiginiarneqarpoq.

Ingerlatsivik Danmarkimi kommunini isumassarsiorsimavoq, taakkunani suliap eqqartuussivimmiinnerani toqqorsiveqarlutik. Najugaqartup toqusimasup pigisaasa qanoq pineqarnissaat pillugu eqqartuussiviup aalajangiinissaata tungaanut toqusup pigisai allamiitinneqartarput ineerarlu najugaqartussap tullissaanut piareersarlugu aserfallatsaaliorneqarluni. 

Ingerlatsivimmit siunnersuutigineqarpoq, toqqorsivimmik atuisoqartassasoq pigisat sulisunit taamaalillutik nutserneqarsinnaalissallutik, najugaqartup toquneranit kingusinnerpaamik ullut tallimat qaangiunneranni ineeraq qanigisaasunit imaarneqarsimanngippat.

Ingerlatsivik naapertorlugu najugaqartup toquneraniit nutaap iserternissaata tungaanut inunnut innarluutilinnut suliassaqarfimmi ukiuni kingullerni najugaqarfinni ineeqqat katillugit qaammatini arfineq marlunni inoqarsimanngillat, Nuummilu utoqqaat illuini ullut qulit tikillugit – ilaannilu sivisunerujussuarmik – inoqarneq ajorlutik.

- Eqqartuussiviup qaqugu aalajangiinissaa akuleruffigisinnaanngilarput, kisianni sivisoorujussuusinnaasarpoq. Utoqqaat illuini najugaqarfinnilu taamaammat aaqqissuusserusuppugut, Ejner Grønvold, Kommuneqarfik Sermersuumi Isumaginninnermut Suliffeqarnermullu Ingerlatsivimmi pisortaq, oqarpoq.

Utaqqisuniittut ikilisinnissaannut siunnersuut iluaqutaasinnaasoq isumaqarpoq. 

Innuttaasut 29-t utaqqisuniittut

Utoqqaat illuini, utoqqaat najugaqatigiiffiini kiisalu inissianut inunnut innarluutilinnut utoqqarnullu naleqqussarneqarsimasunut inissat utaqqisullu pillugit Isumaginninnermut Suliffeqarnermullu Ingerlatsivik Isumaginninnermut Suliffeqarnermullu Ataatsimiititaliamut ukiup affakkaarlugu ilisimatitsisarpoq.

Ingerlatsivik kingullermik apriilimi ilisimatitsivoq. Taamaalimmat innuttaasut 29-t utoqqaat illuannut imaluunniit utoqqaat najugaqatigiiffiinut utaqqisuniipput. Inuit innarluutillit qanoq amerlatigisut najugaqatigiiffinnut utaqqisuniinnersut kommunip nittartagaani allassimanngilaq.

Isumaginninnermut Suliffeqarnermullu Ingerlatsivimmit naatsorsuutigineqarpoq toqqorsivik parnaarneqarsinnaasussaq pillugu suliassaq aningaasaqarnikkut atugassarititaasut atuuttut iluanni aaqqiissuteqarfigineqarsinnaasoq.

Siunnersuut atuutilersinneqassanersoq kommunalbestyrelsimit ungaserujussuanngitsukkut aalajangiiffigineqassaaq.