Utoqqaat pillugit periusissiartaami: Utoqqaat sullissisuminnit siunissami amerlanerulernissaat aarleqqutigineqarpoq

Nunatsinni siunissami utoqqalisussat utoqqarnik sullissisunit amerlanerulernissaat naatsorsuutigineqarmat, Utoqqaat kattuffianni siulittaasuugallartoq aaqqiissutaasinnaasunik siunnersuuteqarpoq.

Allattoq Else Olsvig

marsip 01-at 2023 15:53

Utoqqaat pillugit periusissiaanni nunatsinni utoqqaat 2020-miit 2030-mut utoqqarnik sullissisunit 2.063-nik amerlanerulernissaat Naalakkersuisunit naatsorsuutigineqarpoq.

Nunatsinni siunissami utoqqalisussat utoqqaat illuini sulisunit amerlanerulernissaannik naatsorsuutiginninneq Utoqqaat Kattuffianni siulittaasuugallartup Kasper Larsenip aarlerinartoqartippaa:

- Uku sulisussaaleqinerit eqqarsaatigalugit ilaatigut sulisut amigaateqaraangamik soorunami sullissisinnaanerat killeqartassooq – qularnanngitsumik.

Aamma atuarukNaalakkersuisut utoqqaat pillugit periusissiaq nutaaq saqqummiukkaat: Pilersuisussaatitaaneq atorunnaarsinniarparput

Taamaammat utoqqarnik sullissinerup iluani ilinniartitaanerup pitsanngorsaavigineqarnissaa Kasper Larsenip kaammattuutigaa:

- Imatut ilinniartitsinerit, soorlu isumassuinermik taallugit ilinniartitsinerit, isumaqarpunga aallartinneqartuugunik taakku iluaqutaasinnaasut, immaqami ingerlareerput taakkua isumassuinermik taallugu ilinniartitsinerit.

Naalakkersuisut iliuuseqarumapput

Nunatsinni utoqqaat 2020-mi 3.930-niit ukiut qulit qaangiunneranni, tassa 2030-mi 6.993-nngorsimanissaat naatsorsuutigineqarpoq.

Taamaattumik utoqqarnut periusissialiornissaq pingaaruteqartoq Isumaginninnermut Naalakkersuisoq Jess Svane oqarpoq:

’UTOQQAANEQ PITSAASOQ – PERIARFISSAT, ATUGARISSAARNEQ SIUNISSARLU NUKITTUNERUSOQ’

Periusissiaq naalakkersuisunit februaarip 23-anni sisamanngornermi akuerineqarpoq.

Periusissiaq nutaaq innuttaasut utoqqaat inuunermik atugaannik pitsaassusaanillu pitsanngorsaanissamik siunertaqarpoq. Tamatuma saniatigut inuiaqatigiit aningaasaqarneranut pitsanngorsaataassaaq.

Periusissiaq kommunit, naalakkersuisoqarfiit, peqqinnissaqarfik allallu suleqatigiinnerisa inerneraat.

Periusissiaq utoqqarnut suliassaqarfinnut pitsanngorsaanissamik qulinik siunertaqartunik suliniutitaqarpoq.

Utoqqaat pillugit suliassaqarfimmut inatsit ataatsimoortoq

Utoqqarnik sullissinermik aaqqissuusseqqinneq pillugu suleqatigiissitaq

Utoqqalinersiaqarnermik aaqqissuusseqqinneq

Pilersuisussaatitaanermik atorunnaarsitsineq (Utoqqalinersiaqarnermik aaqqissuusseqqinnerup ilaa)

Utoqqalinersiuteqalernissamut ukiorititat naleqqersuusiornerat

Utoqqaat illuini puiguttortunut immikkoortortanut aningaasat

Suliamut attuumassuteqartunut qanigisaasunullu puiguttorneq pillugu paasisitsiniaaneq

Peqqissaanermik ikiortitut piginnaasaviit naliliivigineqarnerat tunngavigalugit ilinniartitaanermi piumasaqaatinik allannguuteqarneq kiisalu najugarisaq qimannagu ilinniartitaaneq pillugu neqerooruteqarneq

Utoqqaat najugaqatigiiffiinik pilersitsinissamut aningaasat

Utoqqaat illuini sammisassaqartitsinermut kalaalinernullu aningaasat

Paasissutissarsiffik: Naalakkersuisut utoqqaat pillugit periusissiaat: Utoqqaaneq pitsaasoq – periarfissat, atugarissaarneq siunissarlu nukittunerusoq

Allisiguk

- Soorunami isiginngitsuusaaginnarneqarsinnaanngillat, assiliaq taama itttoq takutinneqarsimappat, taamaammat pisussaavugut naalakkersuisuni arlaatigut iliuuseqassalluta.

Jess Svane utoqqarnut iliuusissiaq pillugu taama oqarpoq.

Utoqqaat suliinnarsinnaanissamut periarfissinneqartariaqarput

Nunatsinni 67-inik ukioqalernermi soraarninngorneq utoqqalinersiaqarsinnaanerlu anguneqartarput. Utoqqaalli 67-ileereersimagaluarlutik suliinnarsinnaanissaminnut periarfissinneqartariaqartut Kasper Larsen nangippoq:

- Inuit peqqissut aamma sulerusuttut, tassani isumaqarpunga aamma periarfissaqartariaqartut.

Utoqqaat suliinnarusuttut, soorlu meeqqerivinni meeqqallu atuarfiini atorluarneqarsinnaagaluartut Kasper Larsen oqarpoq:

- Massakkut meeqqat utoqqaallu avissaangagamik, taamatut isaasalerlugu immaqa oqaatigineqarsinnaavoq. Aamma soorlu atuarfinni imaluunniit meeqqerivinni utoqqaat atorneqarsinnaapput immaqa time ataaserluunniit akissartisitillugit.

Utoqqaat Kattuffianni siulittaasuugallartoq Kasper Larsen KNR-imut taama oqarpoq.