Naalakkersuisut utoqqaat pillugit periusissiaq nutaaq saqqummiukkaat: Pilersuisussaatitaaneq atorunnaarsinniarparput

Isumaginninnermut, suliffeqarnermut nunamullu namminermut naalakkersuisup, Jess Svanep utoqqaat pillugit periusissiaq nutaaq tusagassiortunut katersortitsinermi saqqummiuppaa.

Allattoq Hanna Vestergaard Hviid

februaarip 27-at 2023 14:11

Nutserisoq Connie Fontain

Naalakkersuisut tusagassiortunut katersortitsinerat tusagassiortunut katersortitsivimmi nalunaaqutaq 14 aallartippoq. Uanilu isumaginninnermut, suliffeqarnermut nunamullu namminermut naalakkersuisup Naalakkersuisut utoqqaat pillugit periusissiaat nutaaq saqqummiullugu aallartippaa.

Periusissiaq ima ateqarpoq: ’Utoqqaaneq pitsaasoq – periarfissat, atugarissaarneq siunissarlu nukittunerusoq’.

Periusissiaq inuiaqatigiinni ukiuni tulliuttuni allanngungaatsiartoqartussaanera pissutigalugu suliarineqarpoq. Utoqqaat amerlaneruleriartuinnarput, tamannalu ilutigalugu sulisut ikiliartuinnassapput.

Tassa utoqqarnut tunngatillugu aningaasanik atuisoqarnerussaaq, tamatumalu saniatigut sulisussat pisariaqartinneqangaatsiassallutik.

- Siunissami sulisugut ikinnerulernissaat takuneqarsinnaavoq, tamannalu periusissiatsinnut ilanngullugu suliaraarput. Utoqqaat aamma ukioqqortuneruleriartorput, tamannalu isiginngitsuusaarneqarsinnaananilu ajunngilluinnarpoq, Jess Svane oqarpoq.

Ukkatarineqartut sisamat

Periusissiami matumani inuiaqatigiit siunissami utoqqaliartortut soraarnerulertussat sullinniarneeqartut Jess Svanep tusagassiortunut katersortitsinermi paasissutissiissutigaa.

- Ukiuni aggersuni amerlanerusut soraarnerulernissaat eqqarsaatigileriissavarput, taanna oqarpoq, nangillunilu:

- Eqimattat utoqqarnut kiffartuussisussat ukkatarissavagut. Taakku piareersarneqassapput.

’UTOQQAANEQ PITSAASOQ – PERIARFISSAT, ATUGARISSAARNEQ SIUNISSARLU NUKITTUNERUSOQ’

Periusissiaq naalakkersuisunit februaarip 23-anni sisamanngornermi akuerineqarpoq.

Periusissiaq nutaaq innuttaasut utoqqaat inuunermik atugaannik pitsaassusaanillu pitsanngorsaanissamik siunertaqarpoq. Tamatuma saniatigut inuiaqatigiit aningaasaqarneranut pitsanngorsaataassaaq.

Periusissiaq kommunit, naalakkersuisoqarfiit, peqqinnissaqarfik allallu suleqatigiinnerisa inerneraat.

Periusissiaq utoqqarnut suliassaqarfinnut pitsanngorsaanissamik qulinik siunertaqartunik suliniutitaqarpoq.

Utoqqaat pillugit suliassaqarfimmut inatsit ataatsimoortoq

Utoqqarnik sullissinermik aaqqissuusseqqinneq pillugu suleqatigiissitaq

Utoqqalinersiaqarnermik aaqqissuusseqqinneq

Pilersuisussaatitaanermik atorunnaarsitsineq (Utoqqalinersiaqarnermik aaqqissuusseqqinnerup ilaa)

Utoqqalinersiuteqalernissamut ukiorititat naleqqersuusiornerat

Utoqqaat illuini puiguttortunut immikkoortortanut aningaasat

Suliamut attuumassuteqartunut qanigisaasunullu puiguttorneq pillugu paasisitsiniaaneq

Peqqissaanermik ikiortitut piginnaasaviit naliliivigineqarnerat tunngavigalugit ilinniartitaanermi piumasaqaatinik allannguuteqarneq kiisalu najugarisaq qimannagu ilinniartitaaneq pillugu neqerooruteqarneq

Utoqqaat najugaqatigiiffiinik pilersitsinissamut aningaasat

Utoqqaat illuini sammisassaqartitsinermut kalaalinernullu aningaasat

Paasissutissarsiffik: Naalakkersuisut utoqqaat pillugit periusissiaat: Utoqqaaneq pitsaasoq – periarfissat, atugarissaarneq siunissarlu nukittunerusoq

Allisiguk

Taamaammat naalakkersuisut qulequttanik pingaarnernik sisamanik qulinik suliniutertaqartunik suliaqarput. Suliassaqarfiit pingaarnerutinneqartut tassaapput 'utoqqarnut suliassaqarfimmi sulinermut sinaakkutit', 'suliffeqarnerumiinnerunissamut annertunerusumik kajumissaaneq', 'puiguttorneq ukkatrinerullugu' aamma 'utoqqaat inuunerinnerusut sullissilluarnerlu'.

Pilersuisussaatitaanerup atorunnaarsinniarneqarnera

Jess Svanep naalakkersuisut pilersuisussaatitaanermik atorunnaarsitsiniartut oqaatigaa.

Maannakkut soraarnerussutisiat aapparisap suliffeqarnerani isertitaqarneranilu sunnerneqartarput.

- Suliffimmiinnerunissamut kajuminnerulersitserusuppugut. Pilersuisussaatitaaneq tamatumalu sunniutai ullumikkut oqallisaangaatsiartarput. Tamanna utoqqarnut ataqqinninnginnerorpalaarsinnaavoq. Pilersuisussaatitaanerup atorunnaarsinneqarnissaa sulissutigerusupparput, taanna oqarpoq.

Aamma atuarukNunap immikkoortuani nakorsaaneq: Aaqqissuussinerup tamarmiusup ingerlanissaanut aningaasat atussavagut

Maannakkutut itsillugu amerlasuut soraarneruleraangamik nunatsinnit aallartarput. Soraarnerussutisiammi aapparisaq akissarsiaqaraluarpalluunniit Danmarkimi pisinnaatitaaffigaat.

- Nunatsinni tamanna atuutilersikkusupparput, Jess Svane oqarpoq.

Puiguttortunik ukkataqarneq

Tamatuma saniatigut Jess Svanep Naalakkersusiut puiguttortunngorneq ukkatarinerulerniaraat erseqqissaatigaa.

- Puiguttornermut aningaasaliinerorusuppugut. Aningaasanik atuiffiusariaqarpoq, sammisarlu taanna ukkatarineruniarutsigu soorunami pingaarnersiuisariaqarpugut.

- Ilisimasanik amigaateqarpugut. Qanigisaasunut sammisumik paasititsiniaasoqalernissaa pisariaqartipparput.

Naalakkersuisut periusissiamut nutaamut atatillugu Inatsisartuni siammasissumik suleqatigiinnissaat taassuma arlaleriarluni oqaatigaa.