Nunap immikkoortuani nakorsaaneq: Aaqqissuussinerup tamarmiusup ingerlanissaanut aningaasat atussavagut
![](/sites/default/files/styles/image_934x467/public/article_images/jesper_olesen_1.jpg?itok=gfEW7ldj)
Nuummi Dronning Ingridip Peqqissaaviani sulisut amerlanerulernissagunarput.
Maannami Nuummi Peqqissaavimmi nakorsiartunik kiffartuussinerup pitsanngorsarnissaanut sulisunik amerlanerusunik atorfinititsinissamut 3,5 millionit koruuninik immikkoortitsisoqarpoq.
Peqqinnissaqarfimmut pinasuartumik aningaasaliissutit Aningaasaqarnermut Akileraartarnermullu ataatsimiititaliap akuerai.
AAMMA ATUARUK Peqqinnissaqarfimmut pinasuartumik aningaasaliineq: MR-scannerinut nutaaq utaqqinerillu ikinnerit
Aningaasallu taakku atorfissaqartinneqarluinnartut, nunap immikkoortuani nakorsaaneq Jesper Olesen oqarpoq.
- Aningaasat uku Nuup alligaluttuinnarnerata kingunerisaanik ajornartooqqanermut ilaatigut atorneqassapput. Nuummi innuttaasut Dronning Ingridip Peqqissaaviani nakorsiartarfimmut attaveqarniarnerannut malinnaaniarnerput ajornakusuuleraluttuinnartut malugisimassagaat ilimavaara.
- Taamaammat nakorsianik sullissisinnaasunik amerlanerulersitsiniarneruvoq, nakorsaaneq oqarpoq.
![Amalie Poulsen Amalie Poulsen.](/sites/default/files/styles/image_934x467/public/amalie_poulsen_002.jpg?itok=T2rD6NMu)
Amalie Poulsen. Privatfoto.
Nakorsiartarfimmi oqarasuaammut sianerneq sivisusoq, 70-inik ukiullip Amalie Poulsenip Nuummeersup ilisarilluarsinnaavaa.
Aasaq bestilleeqattaaraluarama, naamik ajornaveqaat, pissarsiassaanngillat. Kiisa tassa ukiarpoq, aamma tiguneqarneq ajorpoq. Qanoq ajuilluni ajortiginerpoq, taanna oqarpoq.
Assigiinngitsunik suliaqartut arlallit
Atorfinitsitsineq aallartereerpoq, sulisullu assigiinngitsut Jesper Olesenip ujartorpai.
- Oqarasuaammik tigusisinnaasunik amerlanerusunik atorfinititsineq naammannglaq, kingornatigut nakorsiartitsisinnaasunik aamma amerliliisariaqarpugut. Sianerfigigutsigut ajornartorsiutigisannillu oqaluttuulluta taava ajornartorsiutigisannik aamma ikiortariaqarpatsigit, taanna oqarpoq.
Amerlanertigut Danmarkimit nunatsinnukartussanik pissarsiortarpugut. Peqqinnissaqarfimmi sulisut amerlasuut kalaallisoorsinnaannginnerat pissutigalugu danskisut oqalussinnaanngitsumik nakorsiaqarnerani unammillernartoqalertarpoq.
Taamaammat Jesper Olesenip suleqataata aningaasat taakku oqalutsinut aamma atorneqassanersut isumaliutersuutigissavaat.
- Aaqqissuussinerup tamarmi ingerlanissaanut aningaasat atussavagut, Jesper Olesen oqarpoq.
Naaperiaassoq
3,5 millionit koruunilli siullertut nakorsanik immikkut ittumik ilisimasalinnik peqqissaasunillu nakorsiartitsinermi atorneqartussanik atorfinitsitsinissamut atorneqassapput. Peqqissaavimmi nakorsat immikkut ilisimasallit pingasunit sisamanut amerlassuseqartut maanna amigaatigineqarput, Peqqissaaviullu immikkut ilisimasallit taama amerlatigisut atorfinitsinnissaat iluatsissaguniuk pinasuartumik aningaasaliissutinit aningaasat tamarmik atorneqassasut, Jesper Olesen nassuiaavoq.
Taamaammat Peqqissaavik allanut aamma naaperiaasariaqarpoq.
- Sulisoqartarnitta piffissaa annikillissagunarparput. Atorfinititsinnginnitsinni piffissami sivisunerusumi maaniinnissaannik neqeroorfigeqqaartaraluarpagut, taamaammat pissarsiarinissaat qulakkeerumallugu piffissami sivikinnerusumi maaniinnissaat akuerisariaqarparput, Jesper Olesen oqarpoq.
Tamannali allanut unammillernartoqartitsivoq, peqqissaavimmi peqqissaasunik piffissami sivikitsuinnarmi atorfeqartussanut ilinniartitsinermi isumalluutinik atuisariaqassaaq.
AAMMA ATUARUK Aningaasaliissutit neriuuteqalersitsipput: Nakorsiartartummi utaqqerujussuartarnitik qatsulluinnarpaat
- Taamaammat naaperiaasariaqarpugut, tamannalu allanik ajornartorsiutinik aamma pilersitsissaaq, taamaakkaluartorli inuit amerlanerusut sullinneqarnissaannut sulisussaqarnerussaaq, immikkoortumi nakorsaaneq oqarpoq.
70-inik ukiullip, Amalie Poulsenip pinasuartumik aningaasaliissutit neriuuteqarfigai, taassumalu tamanna nakorsiartarfiup aaqqissuussaanerata eqqarsaatigilluarnissaanut pissutissaqalersitsissasoq neriuutigaa.
- Isumaqarpunga anniaatillit salliunneqassasut. Pingaartumik ukioqqortusiartortut. Uanga nammineq 70-inik ukioqarpunga, inunnillu uannit suli ukioqqortunerusunik aalaakkaannerusumik ikiorneqarnissaminnik pisariaqartitsisoqarpoq, Amalie Poulsen oqarpoq.
Pinasuartumik aningaasaliissutit 3,5 millionit koruunit saniatigut seeqqukkut siffissakkullu suliaritittussat ikilisarnissaannut 6,5 millionit koruuninik ilaqarpoq.