Kommuni eqqaavissuarmut akisussaasuusoq: - Sulisussaaleqivugut

Innaarsunni eqqagassalerinermi kommuni atuuttuartussamik aaqqiissuteqassaaq.

Mittarfeqarfiit ingerlatsinermi pisortaat, Niels Grosen taama isumaqarpoq.

Nunaqarfimmi qulimiguulinnut mittarfeeraq eqqaavissuarmut qanittumiittoq matuneqarallarmat taanna oqaaseqarpoq.

Puussiat plastikkit eqqakkallu allat qulimiguullip qulimiguuanut aquatalu kaavittuanut millugunneqarsinnagamik ulorianavissuusut nalilerneqarpoq. 

- Ajornartorsiut annerpaaq unaavoq massakkut piffinni ajornartorsiorfiusuni sulisussaqannginnata. Innuttaasut 99,9 procentii kommunitsinni sulipput, sulisussaqarniarneq ajornartorsiup qiteraa, Avannaata Kommuniani borgmesteri Palle Jerimiassen taama oqarpoq.

Mittarfeeqqap ullumi aqaguluunniit ammaqqinnissaa Mittarfeqarfiup imaluunniit angallannermik aqutsisoqarfiup, Trafikstyrelsenip, akuerissagaat borgmesterip ilimagaa.

- Massakkut inuit pingasut nunaqarfinniit allaniit Innaarsunnut suliartortitatta ajornartorsiutit tikkuarneqarsimasut peereerpaat, taanna oqarpoq.

Mittarfeeraq erniinnartumik matuneqarmalli sapaatit akunneri marluk sinnerlugit maanna qaangiussimalerput. Saliinerlu ippassaq aatsaat aallartinneqarpoq. Tamannalu pissutigalugu mittarfik sapaatip akunnera suli matoqqatinneqassasoq Mittarfeqarfiit aalajangiipput.

Eqqaavissuup inissisimanera

Mittarfeeqqamik matoqqatitsinerup kinguneranik ikiuigasuartartut Innaarsunnut qulimiguulimmik tikissinnaanngillat. Ajornartorsiullu Palle Jerimiassenip nassuerutigaa.

- Taanna akuersaarneqarsinnaanngilaq, tassunga killittartussaanngilagut. Aamma tassunga killittarnitsinnut peqqutaasut qaangertariaqarpagut, taannalu qaangerniarutsigu tamatta suleqatigiittariaqarpugut, taanna oqarpoq.

Eqqagarpassuit nunaqarfimmiut namminneq iliuuseqarlutik aaqqittariaqaraat taassuma siornatigut oqaatigereerpaa. Naak eqqagassat kommunip akisussaafigigaluarai, borgmesterip tamanna ullumi aalajangiusimavaa.

- Sulisussat taakku piussappata nunaqarfinni aqutsisut innuttaasullu aaqqiissutissatsinnik ujartueqatigiittariaqarput, Palle Jerimiassen oqarpoq.

Eqqaavissuup mittarfeeqqamut qaninnera uggornartuusoq, Mittarfeqarfiit ingerlatsinermi pisortaat oqarpoq. Borgmesterili isumaqataanngilaq.

- Inissisimanera apeqqutaavallaarunanngilaq, taanna oqarpoq:

- Eqqakkanukua amerlivallaartooraangata mittarfimmut qanillivallaartoortartut.

ESANI suleqatigineqalersoq

Eqqakkanik ikuaallaanissamik kommunip qinnuteqaataa Naalakkersuisut ukioq manna siuisinnerusukkut itigartitsissutigaat. 

Innuttaasut peqqissusaat avatangiisillu itigartitsinermut tunngavilersuutaapput. Eqqagarpassuillu qanoq pineqarnissaat taamanili suli aaqqiissuteqarfigineqanngilaq.

Avannaata Kommuniata eqqagassanik ingerlatseqatigiiffimmik ESANI A/S-imik suleqateqarnini 2019-mi unitsippaa.

Kommuni ingerlatseqatigiiffimmik ilumut suleqateqaleqqissanersoq kommunalbestyrelsemit assigiinngitsunik taamanili isummerfigineqartarpoq, decembarimili siorna kiisami aalajangertoqavippoq: Kommuni ingerlatseqatigiiffimmik suleqateqassangilaq.

Kommuni akissaqannginnerarluni taamani tunngavilersuivoq, kommunili ESANI-imik suleqateqarnissamik maanna isumaqatigiissuteqarpoq.

- Taamaattumik aamma Naalakkersunut saaffiginninnikuuvugut ataatsimeeqatigiumallugit, kommmuninit Naalakkersuisut piumasaqaataat, tassa eqqagassalerinermut pilersaarut aammalu ESANI-mik suleqateqalernissamik pilersaarut kommunalbestyrelsemit akuerineqareermata, ikuallaagallarsinnaanermut akuersissummik piumasaqarnerput akuerineqassasoq, Palle Jerimiassen oqarpoq.

Eqqakkallu illoqarfinnut annerusunukaanneqartalernissaat pilersaarutaasoq taassuma nassuiaatigaa. 

- Taannalu anguniarparput, aap eqqaaviit tamarmik atorunnaarneqassasut.