Naammaleqaaq! Avannaa eqqakkanut ammaannartumik ikuallaavittaarnissamut itigarpoq
Avannaata Kommuniani eqqagassanut tunngatillugu, eqqaaviup silaannarmut aniatitaanut toqunartunut Naalakkersuisut isiginngitsuusaarusukkunnaarput.
Taamaammat Avannaata Kommuniata eqqakkat ammaannartumik ikuallanneqartarnissaannik qinnuteqaataa Naalakkersuisunit itigartinneqartoq, tusagassiuutinut nalunaarummi erserpoq.
Avannaata Kommunia eqqagassat pillugit immikkut aaqqiissuteqarallarnissamik qinnuteqannginnermini ungasissumut eqqarsarluni piareersaasiortariaqartoq Naalakkersuisut oqarput, Naalakkersuisummi ammaannartumik ikuallaaviliornissamut utaqqiisaagallartumik aaqqiissuteqartuartarsimagaluarput.
Eqqakkanummi ikuallaaviit ammaannartut inuit peqqissusaannut pinngortitamullu ulorianarluinnartuupput.
Akuutissaq inunnut toqunartumik akulerujussuaq
- Naalakkersuisuniit eqqagassalerineq pingaaruteqarluinnartutut inissisimatinneqarpoq. Nuna tamakkerlugu innuttaasut minguitsumik peqqinnartumillu avatangiiseqarnissartik pisinnaatitaaffigaat, Avatangiisinut Naalakkersuisoq Kalistat Lund tusagassiutinut nalunaarummi taama issuarnearpoq.
Dioxin tassaavoq akuutissat toqunartut assigiinngitsut ataatsimoortut taaguutaat, tassaasut:
* polychlorerededibenzo-para-dioxiner (PCDD)
* polychlorerede dibenzofuraner (PCDF)
* polychlorerede biphenyler (PCB)
Akuutissaq taanna inuup nassaarisimasaanit tamanit toqunarnerpaatut nalilerneqartarpoq, oqaatigineqartarporlu homoninut ajoquseerujussuarsinnaassuseqartoq aammalu kræftilissutaasinnaasoq. Dioxin tassaavortaaq ikuallaanernermi aammalu sanaartornernut assigiinngitsunut atorneqartartoq.
Paasissutissamik aallerfik: : MiljøstyrelsenTassalu imaappoq; akuutissaq toqunartulerujussuaq dioxin inunnullu ulorianarluinnartuusoq aammalu nerisassanut mingutsitsisinnaaqisoq eqqakkanik ikuallaanerni akuerisaasarpoq.
- Ikuallaanerit pitsaanngitsumik pisarmata mingummik annertoorujussuarmik maangaannartitsisoqartarpoq, tassaana taanna qaangerniarneqartoq akuutissaq toqunartorujussuaq dioxin piuneerutsittariaqaratsigu, Kalistat Lund KNR-mut oqarpoq.
Avannaatali Kommuniani borgmesterip Palle Jerimiassenip eqqakkat kommunip illoqarfiini nunaqarfiinilu mingutsitsilernissaat ernumagineruaa.
- Inoqarfinni eqqagarpassuaqarpoq taakkulu ikuallanneqanngikkunik teqqassapput nunaqarfimmullu takussunarsaataalerlutik, borgmester Palle Jerimiassen KNR-mut oqarpoq.
Eqqagassalereriaaseq assortuussutaasoq
Avannaata Kommunia 2019-mili Kommunit ataatsimoorlutik eqqagassalerinermik ingerlatseqatigiiffiannut ESANI A/S-mut, 2019-mili ilaasortaajunnaarpoq, taamatuttaaq Avannaata kommunia maannakkorpiaq aaqqiissutissanik naammaginartunik annertussusilinnik ujartuinissamut piumasaqaat naammassisinnaasimanngilaa.
Avannaata Kommuniata ESANI-mit ilaasortaajunnaarnini ilaasortaanerup akisuallaarnerannik tunngavilersuuteqarfigaa.
Kommunalbestyrelselu politikkikkut maanna aalajangerpoq.
Kommunalbestyrelse novembarip 25-anni aalajangerpoq, Esani A/S ilaasortaaffigeqqinniarnagu.
AAMMA ATUARUK Skraldet hober sig op - alligevel dropper Avannaata Kommunia affaldsselskab
Allatut oqaatigalugu Avannaata Kommunia kisimiilluni ingerlarusuppoq, tassa kommunit sisamaasut allat peqatigalugit ingerlarusunngilaq.
Allaaserisamilu allassimavoq Nuummi Sisimiunilu ikuallaavimmik matoqqasumik sanasoqalersoq, taannalu 2024-mi naammassineqassasoq. Tamatumalu saniatigut Tasiilamut imaluunniit Qasigiannguanut umiarsuarmik eqqakkanik aallertoqartassaaq, taakkulu aaneqartut Sisimiunut Nuummullu assartorneqartassapput ikuallaaviannilu isumagineqartassallutik.
Periuserlu taanna Palle Jerimiassenip Avannaata Kommunianut tulluartuunnginnerarpaa. Avannaanimi nunaqarfippassuaqarlunilu illoqarfippassuaqarpoq ukiumi piffissap annersaani sikusartuusumik taamaalillunilu umiarsuarmik tikinneqarsinnaanngitsunik.
Taassumali taama oqarnera Kalistat Lundip akuersaanngilaa.
Taannami naapertorlugu Avannaani eqqakkat katersorneqarsinnaapput ukiukkullu poortorneqarsinnaallutik, sikueraangallu umiarsuarmik assartorneqarsinnaallutik.
Kalistat Lundip illoqarfiit allat avinngarusimasumiittut assersuutigai:
- Nalunngilarput Ittoqqortoormiinut aasaq kingulleq eqqakkanik umiarsuarmik aallertoqartoq. Illoqarfik avinngarusimasumiippoq, nunaqarfiinullu aamma eqqakkat aaneqarput, taanna oqarpoq.
400 millioner koruunit Kommunemut siunnersuutaapput
Avannaata Kommuniani Ingerlatsinermut teknikkeqarnermullu pisortaasup KNR-mut allakkatigut akissutai naapertorlugit. Avannaata Kommuniani inoqarfinni tamani ikuallaaviliortoqassappat qanoq akeqakannersinnaanera oqaatigineqarpoq, tassalu 391,5 millioner koruuninik naleqartussaasoq tagginneqarluni, akillu taassuma saniatigut ingerlatsinermi ukiumut aamma akiliisoqartartussaavoq.
Illoqarfiit sisamaasut tamarmik aammalu nunaqarfik Kullorsuaq ikuallaavilerneqassappata tamanna 93,2 millioner koruuninik naleqassaaq ukiumut ingerlatsineq ilanngunnagu.
Tassalu imaappoq aki taanna ESANI A/S-mut ilaaasotaanermiit akisunerujussuuvoq.
Taamatuttaaq kommune arlaannaannulluunniit attuumassuteqanngitsumik ESANI-mut ilaasortaassagaluaruni misissuisitsivvoq, paasinarsivorlu tamaat ataatsikkut akiligassami 27,6 millioner koruuninik naleqassasoq ukiorlu naallugu ingerlatsineq 3,7 millioner koruuninik naleqassasoq.
Avannaata kommuneata eqqakkanut tunngatillugu qanoq aaqqiissuteqarnialersaarnera suli ilisimaneqanngilaq
Kalistat Lundili isumaqarpoq, ESANI A/S-mut ilaasortaaneq aaqqiissutissatut pitsaanerpaassasoq.
- Aningaasaqarnikkut avatangiisillu eqqarsaatigalugit aaqqiissutissatut pitsaanerpaatut Avannaata Kommuniata nuna tamakkerlugu eqqagassalerinermi aaqqiissutissamut, kommunit suleqatigiiffigisaannut aammalu eqqakkat nuna tamakkerlugu ikuallaavinni ikuallanneqartarfiannut ilannguteqqittariaqaraluarpoq”, Kalistat Lund tusagassiutinut nalunaarummi taama issuarneqarpoq.
Taanna februaarip 20-iani Ilulissanukassaaq taamalu Avannaata Kommuniani aallartitat eqqakkat qanoq aaqqiivigineqarsinnaanerat pillugu oqaloqatigissallugit 00:07:41
