Qulimiguulinnut mittarfiup matoqqanera sivitsortoq: Innaarsunni suli eqqagarpassuaqartoq

Innaarsunni qulimiguulinnut mittarfiup qanittuani eqqagaqarnera pissutigalugu nunaqarfimmut timmisartuussinerit Mittarfeqarfiit sapaatit akunneri marluk matuma siorna unitsippaat.

Pissutsilli suli allanngunngillat. 

Qulimiguulinnut mittarfiup qanittuani eqqaavissuarmi eqqagarpassuit timmisartuussinermi isumannaallisaanermut suli ulorianartorsiortitsisinnaammata sapaatip akunnera suli timmisartuussisoqassanngilaq.

Mittarfeqarfiit ingerlatsinermi pisortaat, Niels Grosen, taama ilisimatitsivoq:

- Eqqakkanik suli saliisoqarsimanngitsoq ippassaq (ataasinngormat, aaqq.) tusarparput, taanna oqarpoq.

Kommunilu saliinissamut ikiuussinnaasussarsiorluni Upernavimmut nunaqarfiinnullu attaveqarsimasoq taassuma ilanngullugu oqaatigaa.

- Saliinerit aallartittut mittarfimmi pisortap ilisimateqqammerpaanga. Saliineq piareertoq paasitinneqarutta Innaarsunnukassaagut, mittarfillu ammaqqinneqarsiinnaanersoq nalilissavarput.

Eqqagarpassuit

Innaarsunni eqqagaqarnerujussua pissutigalugu qulimiguulinnut mittarfik ukioq manna marloriarluni matuvoq. Apriilimimi taama pisoqarpoq. Puussiammi plastikkit eqqakkallu allat silaannarmut qangattaanneqarlutik qulimiguullip qulaani aquanilu kaavittuinit millugunneqarsinnaanerat ajornartorsiutaavoq.

- Eqqakkanik ikuallaavimmi eqqagarpassuarnik isumaginnissinnaasumik eqqaavilerisumik amigaateqarpugut, nunaqarfimmi najugalik Pia Kristensen oqarpoq.  

Eqqakkanillu ikuallatassanik suliaqartussaq isumaginninnissaminut akuersissuteqartariaqartoq, taanna isumaqarpoq.

- Nunaqarfimmi eqqakkanik illuniit assartuinissamut ATV-nik allanillu assartuutinik ingerlatsisinnaanermut akuersissuteqartoqanngilaq, Pia Kristensen ilisimatitsivoq.

Eqqagarpassuarnik isumaginnissinnaasumik pissarsiornissaq nunaqarfimmi innuttaasut suliassarigaat Avannaata Kommuniani borgmesteri, Palle Jerimiassen, KNR-imut qaammatip siuliani oqarpoq. Aatsaallu massakkut aaqqiissuteqartoqarallarpoq.

Upernavimmi kommunimi sulisoq Innaarsunni eqqakkanik ikuallaajartoruni ippassaq tikissimassasoq, nunaqarfinni aqutsisut siulittaasuat Karl Petersen oqarpoq.

Atuuttuartussamik aaqqiisuteqarneq

Kommunimi eqqagassalerisut akissarsiaasa qaffannissaat kommunip SIK-llu qanittumi isumaqatigiissutigaat, Innaarsummili ajornartorsiummut suli iluaqutaalersimannginnguatsiarpoq.  

- Eqqakkat isumagineqarnissaannut kommuni atuuttuartussamik aaqqiissuteqartussaavoq, pingaartumik Innaarsunni eqqaavissuaq qulimiguulinnut mittarfimmut taama qanitsigitillugu. Eqqaavissuup taama qanitsiginera uggornaqaaq, Mittarfeqarfiit ingerlatsinermi pisortaat Niels Grosen oqarpoq. 

Nunaqarfimmimi eqqaavissuarmi aaqqiisoqarnissaa kommunep suliassaraa.

- Innaarsunni pissutit maanna navianarsinnaanerat nalunngilarput. Sumiiffinni allani aamma taamaattoqarsinnaanera soorunami alaatsinaapparput.