Innaarsunni qulimiguulinnut mittarfik sapaatit akunneranni miffigeqqusaajunnaarallartoq
Innaarsunni qulimiguulinnut mittarfiup qanittuani eqqagassat maaniinnarmiitut amerlavallaarnerat peqqutaallutik, ukiormanna aappassaanik miffigeqqusaajunnaarpoq.
Tassami eqqakkat teqqalariaannaat peqqutigalugit mittarfiup sapaatit akunneranni miffigeqqusaajunnaarallartoq Mittarfeqarfinniit nalunaarutigineqarpoq.
Ajornartorsiut takornartaanngilaq
Innaarsunni Aappilattuni Naajaanilu nunaqarfinni aqutsisut siulittaasuat Karl Petersen ajornartorsiummut takornartaannginneraavoq.
- Assorsuaq tipeqarput aammalu anartarfiit poorsui imallit, aammalu eqqagassat. Kiisalu suliffeqarfiit igitassaataat aamma ilanngullugit eqqaaveqarfiit ingerlakkatsigit. Innaarsunni Aappilattumilu pissutsit assigeeqqissaarput, mittarfinnut aqqutaapput. Karl Petersen taama oqarpoq.
Avannaata kommuniani borgmesterip Palle Jerimiassennip nunaqarfimmiut ajornartorsiummut aaqqeeqatiserai.
-Nunaqarfimmiut aamma ikioqatigisariaqarpaatigut, akisussaaffimmik tigusisariaqarput. Innaarsunni sulisumik amigaateqarpugut, taannalu sivisuumik aaqqinniarsimavarput.
Eqqaavilerisutullu sulisussanut borgmesterip SIK-mut akissarsiat pitsaanerulerneranik isumaqatigiissuteqarnikuuvoq.
-Aamma SIK massakkut isumaqatigiissuteqarfiginikuuarput, taamatut eqqaavilerinermut suliaqartunik amigaateqarnerput pissutigalugu aningaasarsiatingut aaqqiissutaasinnaasunik pensioneqarnissaannut isumaqatigiissutinik tamakkua tamaasa atsioreernikuuakka taamaanillunilu massakkut tanna piviusunngulerpoq pilerinarnerulertussaassooq eqqaavilerinermik sulinissaq. Palle Jerimiassen taama oqarpoq.
Eqqakkanik ammaannartumik ikuallaasarneq
Eqqakkanik ammaannartumik ikuallaasarneq peqqissuseq avatangiisillu eqqarsaatigalugit aaqqiissutissatut pitsaasuunngimmat tamanna inatsimmi inerteqqutaavoq.
Avannaata Kommunia illoqarfinni nunaqarfinnilu tamani eqqaavissuarni ammaannartuni ikuallaanissamut siornatigullu akuerineqartarpoq.
Eqqagassalerinermulli pilersaaruteqanngimmat februaarimi qinnuteqaataa Naalakkersuisut itigartitsissutigaat. Kommunili maanna pilersaaruteqalerami qinnuteqaqqinniarpoq.
