Sulisitsisut: Siumut Nuummit annilaangasaarut
![](/sites/default/files/styles/image_934x467/public/2023-08/20191115-155507-2-1920x1280we.jpg?itok=iFt5D_cN)
Kalaallit Nunaanni suliffeqarfeqarfimmut annertoqisumik kinguneqarsinnaavoq ingerlatsiviit pillarneqaatigisinnaasannik kinguneqartumik inatsisiliortoqassappat – qanoq ittumiluunniit – siunissami inuit kalaallisut oqalunneq ajortut atorfinitsikkunikkit.
Sulisitsisut pisortaanniit Christian Keldsenimit taama nipeqarpoq.
- Inuit suliffeqarfeqarfeqarfimmiit annilaangatilersinnaavai imaluunnit ilanngutitinngitsoortillugit, KNR-imut oqarpoq.
Nuummi Siumup immikkoortuaniit inatsisitut siunnersuutissatut isumassarsiaq pillugu qisuariarpoq: Tassa siunnersuutigineqarmat kikkut tamarmik pisortat suliffeqarfiini siunissami atorfinittussat kalaallisut oqalussinnaasariaqassasut.
Qinnuteqartorlu taamaanngippat sulisitsisoq pilaatitut ittumik pineqartariaqarpoq. Kisianni sulisitsisoq kalaallisut oqaluttuunngitsumik atorfinititsiniaruni immikkut akuerineqarnissaminut qinnuteqarsinnaavoq – kisianni sulisitsisoq tunngavilersuilluartariaqarpoq.
Qarsoq Høegh-Dam illoqarfiit pingaarnersaani Siumup immikoortuani siulittaasoq siunnersuuteqartuuvoq, tamannalu pivoq sapaatip akunnerata naanerani partiiip ataatsimeersuarnerani.
Suliffissaaleqisoqanngilaq
Siumut Nuuk naapertorlugu nunami maani nunap inoqqaavi sulisunut avataaneersunut unammillersinnaanngillat.
- Kalaaleq arlaatigut siulliunneqartariaqarpoq. Annikitsortai paasiumaarpavut. Kisianni suliffissaqarpat kalaalerlu piukkunnartoq atorneqarsinnaappat, taava soorunami aqqutissaqartariaqarpoq pineqartup allanit siulliunneqarnissaanut, Qarsoq Høegh-Dam oqarpoq.
Kisianni piviusuni eqquussinnaanngilaq, Christian Keldsen naliliivoq.
- Oqaatigisassat marluupput. Siulleq tassaavoq, Kalaallit Nunaanni suliffissaaleqineq 0 procentiummat isummerfigissagipput. Taavalu aamma piumasaqaatit kinaassusersiortuunngitsut arlaat toqqassallugit naammassineqarnissaat ajornakusoorsinnaavoq.
- Aappaattullu isumaqarpunga kukkunerussanngitsoq oqaraanni sulisitsisoq ataasiinnarluunniit taamatut atorfinititsisarnermik atuineq ajortoq. Amerlanerpaammi nunaqavissoq tamatigut atorfinitsikkusunnerusarpaat.
Inuttut illersoruminaappoq
Qarsoq Høegh-Dam naapertorlugu imaanngilaq kalaallisut oqalunneq ajortut suliffissanit mattunneqartassammata.
Taanna malillugu imaaginnarpoq Kalaallit Nunaat aamma ilanngutititsinermut inatsiseqalissasoq – soorlu Danmarkimi – kalaallisut oqalussinnaaffiusumik. Tassa Kalaallit Nunaanni atorfinitsinneqarniaraanni kalaallisut oqalussinnaasariaqarpoq, ippassaq Qarsoq Høegh-Dam KNR-imut oqarpoq.
Kisianni Christian Keldsen naapertorlugu oqaatsinik piumasaqaat ilanngutitinneqarnisssamut attuumassuteqanngilaq. Akerlianik inuit suliffeqarfeqarfimmit annilaartissinnaavaat imaluunniit ilanngutitinngitsoortillugit, isumaqarpoq.
- Piviusoq imaappoq atorfiit ilaat piginnaasanik piumasaqarfiusinnaasut, taakkunanilu oqaatsit ilaasinnaalluarput. Kalaallit oqaasii imaluuniit oqaatsit allat kinaassusersiortuunngitsumik tunngavilersuutaasinnaanerannik atorfissarpassuaqarpoq, oqarpoq nangillunilu:
- Kisianni inuit aalajangersimasumik piginnaasallit atorfinitsinnerat pillugu pillaanermik eqqussinerup inuttut illersorneqarsinnaanera takujuminaatsippara.