Sulisitsisut peqatigiiffiisa ileqqorissaarnermik isummernerat
Naalakkersuisut inuiaqatigiit suliffeqarfiutaanni qullersanut ileqqorissaarnissamik malittarisassiussappat? Demokraatit taama isumaqarput. Taakku isumaqarput sullivinni pisortat maligassiuisussaasut taamaattumillu – politikerit assigalugit – inatsisinik unioqqutitsigaangamik kingunissai eqqarsaatigisariaqaraat.
Sulisitsisut peqatigiiffii apeqqut pillugu assigiinngitsunik isumaqarput:
Politikerinut tunngatillugu erseqqarilluinnarpoq. Inatsisinik unioqqutitsigunik kingunissai nalunngilaat. Taamalu pisoqaraangat tunuartarput. Apeqqutaavoq Namminersornerullutik Oqartussat suliffeqarfiutaanni pisortanut tamanna aamma atuutsissanersoq. Demokraatit taama isumaqarput.
Kisianni pisortat pissusilersornerat piginnittut, tassa Namminersornerullutik Oqartussat suliffeqarfiullu siuttuisa akornanni aaqqitassaavoq. Taama isumaqarpoq Gerth Lynge Nunaqavissut suliffiutillit Kattuffianni Nusukami siulittaasuusoq, taakkua Namminersornerullutik Oqartussat suliffeqarfiutaat KNI ilaasortaraat.
Gerth Lynge aammattaaq isumaqarpoq inuup kiffaanngissuseqarluni inuunerata aamma inuiaqatigiinni ilisimaneqarnerup akulerussuunnissaat mianerisariaqartoq.
Sulisitsisut peqatigiiffianni Ilik-mi pisortaq Ole Kielmann Hansen isumaqarpoq qinikkat aamma suliffeqarfinni piginittut pisortassatut toqqagaannut assigiimmik pissuseqartoqartariaqartoq, sulliviit namminersortuuppata inuiaqatigiinnilluunniit pigineqarpata apeqqutaatinnagu.
- Sullivimmi pisortap akisussaaffigaa maligassiuisutut isigineqassanerluni, Ole Kielmann Hansen Oqarpoq. Taassuma oqaatigaa suliffeqarfiit amerlanerusut suliffeqarfiup pingaartitaanik malittarisassiortartut. Aamma Ilik-mi pisortaq oqarpoq suliffeqarfiit pisortanit pigineqartut taamatut assingusunik malittarisassiorsinnaasut.
Namminersornerullutik Oqartussat suliffeqarfiutaasa annerit ilaat Royal Greenland GA-mi ilaasortaavoq. Kisianni GA-mi pisortaq Ole Rud suliffeqarfiit siuttuinut ileqqorissaarnissamut malittarisassaqassanersoq isummerfigerusunnagulu oqaaseqarfigiumanngilaa.
