Parisimi isumaqatigiissutip nunatsinnut kingunissaanik ilisimasat Sulisitsisut paaserusukkaat

Parisimi isumaqatigiissut inuiaqatigiinnut kinguneqangaatsiarsinnaavoq, Sulisitsisullu Naalakkersuisut ilanngunneq qanoq atorneraat pillugu paasissutissanik pissarserusupput.
- Hvis man vil udvikle det private erhverv og have udefrakommende investeringer, så er vi er vi nødt til at sikre os stabile rammebetingelser, og så kan vi ikke tilslutte og fraslutte os forskellige aftaler, siger Christian Keldsen. Assi © : KNR
Allattoq Mathies Hvid Toft
novembarip 05-at 2021 06:03

Naalakkersuisut nunatsinnik nunat tamalaat akornanni Parisimi isumaqatigiissummut ilanngutititsiniarnerat ajortuusariaqanngilaq.

Illuatungaanilu aamma nunatsinni ineriartornermut ilaqutaasariaqarani.

Sulisitsisut pisortaat, Christian Keldsen oqarpoq.

- Isumaqatigiissuteqarnissaq ajornanngitsuuvoq. Isumaqatigiissummi tunniussassat unammillernartuupput. Aarlerissutsimik naliliinermik pitsaasumik aalajangersimasumillu maanna qanoq pisoqarnissaanut qanorlu iliornissatsinnut naliliinermik peqarnissaa naatsorsuutigaarput.

AAMMA ATUARUK Múte B. Egede Parisimi isumaqatigiissummut ilaalernissaq pillugu: Aningaasarsiornikkut nutaanik periarfissiissaaaq

Sulisitsisut aalajangiinissamut suliaqarnermi ilanngunneqarsimanngitsut, Christian Keldsenip paasissutissiissutigaa.

Illuatungiliuttut partiivisa marluk tassa Siumup Demokraatillu aalajangiineq sakkortuumik isornartorsiorpaat, Naalakkersuisullu kisermaassillutik iliuuseqarnerarlugit.

Ammasumik oqallittoqarnissaa pingaaruteqartoq

Naalakkersuisut illuatungiliuttunik, inuussutissarsiuteqartunik nunatsinnilu innuttaasunik oqalliseqatiginninnissaat pingaaruteqartoq, Christian Keldsenip erseqqissaatigaa.

Isumaqatigiissummummi ilanngunneq taavalu ukiualuit kingornatigut politikkikkut akerliliisoqarnerani isumaqatigiissummit aneqqinneq iluaqutaanngilaq.

- Inuussutissarsiortut namminersortut ineriartortinniaraanni avataaniillu aningaasaliisoqarniaraanni taava sinaakkutinut piumasaqaatit pitsaasut qulakkeertariaqarpagut, isumaqatigiissutinullu assigiinngitsunut ilanngullutalu ilaajunnaarsinnaanata.

AAMMA ATUARUK Lektori naliliivoq: Parisimi isumaqatigiissut aatsitassarsiornermut periarfissakinnerulersitsisinnaavoq

Tamatuma saniatigut Sulisitsisut oqarnerat naapertorlugu Naalakkersuisut aalajangernerata kingunerisaanik ajornartunik oqallittoqassaaq.

Nunatsinni maanna nukissiuutit annerpaartaat ikummatissaneersuupput, naak nukissiorfiit erngup nukinganik nukissiuutinut 70 procentiugaluarpoq.

- Isumaqatigiissummi anguniarneqartoq malillugu CO2-mik aniatitsinemrik annikillisaaqataassaagut. Tamanna erngup nukinganik nukissiorfimmik ataatsimik marlunnilluunniit kisimi pilersitsinerunngilaq, imaluunniit inuussutissarsiuteqartut kisimik kivitsinissaat naatsorsuutaasinnaanngilaq. Inuiaqatigiinni aaqqissuussaanermi iliuuseqarnissarput aamma pisariaqarpoq, Christian Keldsen oqarpoq.

Suliassat ilungersunarnerusut maanna aallartittut

Taassuma nunatsinni CO2-mik aniatitsineq annikilliniarneqavissaguni allannguuteqangaatsiartoqarsinnaassasoraa.

Assersuutigalugu CO2-mik aniatitsinermik annikillisaaniarnermi najugaqariaaseq maanna unammillernartuuvoq, pissutigalugu illoqarfiit minnerit nunaqarfiillu amerlanerit generatorinik ikummatissanik atuisunik nukissiuuteqarmata.

- Isumaqatigiissutip attorusunneq ajoraluakkagut inuiaqatigiinnitsinnilu naleqartitagut allanngortissagunarpai, taanna oqarpoq, nangillunilu:

- Sulineq annertooq maanna aallartippoq.

Aamma atuaruk