Sulisitsisut: Nalunaaquttap akunnermik ataatsimik siuartinneqarnialersaarnera isumatsialaavoq
Naalakkersuisut suliassaqarfik "Nalunaaquttap aalajangersarneqarnera" maajimi akisussaaffigileramikku nalunaaqutarput qanoq nikittarfeqalissanersoq namminneq aalajangersinnaalerpaat.
Nunatta Europallu nalunaaqutaasa nikingassutaat akunnermik ataatsimik sivikillineqassasoq, Naalakkersuisut siunnersuutigeqqammerpaat. Siunnersuutaat akuerineqassappat, nunatta Danmarkillu nalunaaqutaat akunnernik pingasunik nikingalissapput.
Naalakkersuisut siunnersuutaat taanna maanna tusarniaassutigineqaleruttortoq nittartagaanni atuarneqarsinnaavoq.
Siunnersuutaalli Inatsisartunit aatsaat akuerineqassappat, "Nalunaaquttap aalajangersarneqarnera" suliassaqarfigilissavaat. Taamaattoqassanersorli Inatsisartuni taasissutigineqaqqaassaaq, ilutigalugulu nalunaaqutatta ukiortaami atuutilersumik siuartinneqarnissaanik siunnersuut akuereqqaassallugu.
AAMMA ATUARUK Kalaallit Nunaata nalunaaqutaqatigiissut nammineq aalajangiiffigisinnaalerai
Inatsisartullu Naalakkersuisut siunnersuutaat akuerissappassuk, nalunaaqutarput akunnermik ataatsimik ukiortaami assersuutigalugu ualikkut nalunaaqutaq marluniit pingasunut siuartissaaq.
Nunatsinni nalunaaquttap nikittarfii tamarluinnangajammik assigiipput. Kisianni:
Ittoqqortoormiit Islandillu nalunaaqutaasa nikittarfii assigiipput - Nuummi ulloqeqqaraangat Ittoqqortoormiini nalunaaqutaq ataatsimunngortarpoq.
Pituffiup Amerika kangialu nalunaaqutaasa nikittarfii assigiipput. Nuummi ulloqeqqaraangat Pituffimmi nalunaaqutaq aqqanermunngortarpoq.
Tunumilu nunami eqqissisimatitami silasiorfimmi Danmarkshavnimi nalunaaqutaq marlunngoraangat Nuummi ulloqeqqartarpoq.
Taamaattoqassappallu nunatta, Islandip, Savalimmiut taavalu Tuluit Nunaata nalunaaqutaasa nikingassutaat akunnerit marlunngussapput, taavalu nunatta, Danmarkip, Norgep, Sverigep, Tysklandip Europallu kitaani nunat allat nalunaaqutaasa nikingassutaat akunnerit pingasunngussallutik.
Kisianni Ittoqqortoormiit (tamaani Europallu kitaani nalunaaquttat akunnernik pingasunik nikingareerput) Danmarkshavnip Pituffiullu nalunaaqutaat siuartinneqassanngillat.
Sulisitsisut nalunaaquttamik siuartitsineq pitsaaquteqassasorigaat
Nunatsinni inuussutissarsiortut Europamik niueqateqarnermi sivisunerusumik atassuteqalissagunik piffissamik atorluaanerussammat tamanna qularnanngitsumik nuannaarutigissagaat, Sulisitsisuni pisortaq Christian Keldsen isumaqarpoq.
Nunatsinnili Europamilu nalunaaquttat nikingassutaat sivikillineqassappat, nunatsinni nunanilu nunatta kimmut saniliini nalunaaquttat nikingassutaat akunnermik ataatsimik sivitsussaaq.
- Taamaaliortoqassappat tamanna nunatta Danmarkimik, Europamik Tuluit Nunaannik niueqateqarnerani qularnanngitsumik nutaanik periarfissaqalertitsissaaq.
- Taamaalillutik ulluinnarni atassuteqarnerat akunnermik ataatsimik sivitsussaaq. Aammali nunatta Amerika avannarlillu nalunaaqutaasa nikingassutaat akunnermik ataatsimik sivitsussalluni. Amerika avannarlermi isumalluarfigalugulu arlalitsigut niueqatigaarput. Europamilli maannakkorpiaq niueqateqarnerput eqqarsaatigalugu isumatsialaavoq, Christian Keldsen oqarpoq.
Air Greenlandip aamma isumatsiaasorigaa
Air Greenlandip nunatta Europallu kitaata nalunaaqutaasa nikingassutaat akunnermik ataatsimik sivikillinissaanik siunnersuut aamma isumatsialaasoraaa.
Nunatsinniimmi Danmarkimut tikittut nunatta Danmarkillu nalunaaqutaasa akunnernik sisamanik nikinganerannik sungiussiniapiloortartut tusarnartarinngilarput. Timmisartortartullumi aamma sungiussnniapiloortarpaat.
Timmisartuni inuttat nunamiit nunamut allamukaraangamik nunat angallaffigisatik nalunaaqutaasa nikinganerat alaatsinaattariaqartarpaat. Taakkumi angallassereeraangamik pinngitsooratik qasuersaartussaapput, malittarisassaqarlutillumi.
Nalunaaquttat akunnernik pingasunik nikingalissappata tamanna allannguuteqaataassasoq, Air Greenland nassuiaavoq. Tassa timmisartumi inuttaq nunami akunnernik sisamanik siulliusumik nalunaaqutalimmi unnuigaangami pinngitsoorani ulluni pingasuni qasuersaartussaavoq. Akunnernilli pingasunik sivikinnerusumilluunniit siulliusumik nalunaaqutalimmi unnuigaangami qanoq sivisutigisumik sulisimanersoq apeqqutaalluni nalinginnaasumik qasuersaartussaavoq, tamannalu nalunaaquttap akunnerinik aqqaneq-marlunnik sivisussuseqakkajuppoq.
Tamannalu timmisartuutileqatigiiffiup eqaannerusumik inuttalersuisinnaanngorneranik kinguneqassasoq, Air Greenlandip timmisartuussinermut pisortaa Niels Chemnitz Frederiksen oqarpoq.
- Siunnersuut Air Greenlandimit qujarupparput, akuerineqassappammi eqaannerusumik timmisartuussisinnaanngussallutalu inuttalersuisinnaanngussaagut. Uagutsinnut timmisartuussatsinnullumi pisariillisaataassaaq.
- Oqartussaasorpullu, tassa Danmarkimi angallannermut aqutsisoqarfik Trafikstyrelsen, ulluinnarni atassuteqarnerput akunnermik ataatsimik sivitsussaaq. Tamanna iluaqutassaaqaaq, akuerilertugassanimmi suliassaqartilluta oqartussaasorpullu ataqatigiissaareqatigiinnissatsinnut periarfissaqarnerulissaagut, Niels Chemnitz Frederiksen oqarpoq.
