Aaja Chemnitz suleqatigiissitat pillugit USA-p oqaaseqaatai pillugit: Uniorujussuarput
Præsidentip Illorsuani tusagassiortunut nalunaaruteqartartup Karoline Leavitt-ip sisamanngornermi unnukkut oqaatigisai Folketingimi ilaasortap Aaja Chemnitzip (IA) naammaginanngilluinnarlugillu uissuummissutigai.
Suleqatigiissitat USA-p, Danmarkip Kalaallit Nunaatalu pingasunngornermi isumaqatigiissutigisimasaasa "Kalaallit Nunaata tiguarneqarnissaa" oqaluuserissagaat, Karoline Leavitt tusagassiortunik katersortitsinermi oqarpoq.
– Ataatsimiinnermi isumaqatigiissutigineqartoq taamaanngitsoq Lars Løkke Rasmussenip Vivian Motzfeldtillu oqaasiinit erserpoq, Danmarkip nunanut allanut ministeria aamma Kalaallit Nunaata nunanut allanut tunngasunut naalakkersuisua innersuutigalugit Aaja Chemnitz oqarpoq.
- Taamaattumik (USA, aaqq.) isumaqatigiissutigineqartunik piviusunngortitsisinnaanera naatsorsuutigineqarsinnaanngippat suleqatigiuminaappoq. Taamaattumik tatiginarpallaanngitsutut isigaara, Aaja Chemnitz oqarpoq.
Suleqatigiissitat
Lars Løkke Rasmussenip (M) Vivian Motzfeldtillu Washington D.C-mi USA-p præsidentiata tullersortaa J.D. Vance aamma nunanut allanut ministeria Marco Rubio pingasunngornermi ataatsimeeqatigaat.
USA-p præsidentiata Donald Trumpip isumannaallisaanermut politikki tunngavigalugu Kalaallit Nunaat “pigerusullugu” uteqattaarereernerata kingorna taama pisoqarpoq. Taamatut kissaateqarnera Danmarkip Kalaallit Nunaatalu itigartilluinnartarpaat.
Washington D.C-mi ataatsimiinnerup nalaani suleqatigiissitaliornissaq illuatungeriit isumaqatigiissutigaat. Sapaatit-akunnialuit qaangiuppata ataatsimeerngaarsinnaanissaat danskit naatsorsuutigaat.
"Tuniniagaanngitsoq pisiarineqarsinnaanngitsoq", Aaja Chemnitz oqarpoq.
- Tamanna tusindileriarluta assigiinngitsorpassuartigut oqaatigisarparput. Kalaallit Nunaanninngaanneersorpassuusugut taamatut oqarpugut. Tamanna Kalaallit Nunaanni isiginnittaatsimut naapertuutinngilaq.
- Iligisat ataatsimeeqatigisimasat isumaqatigiissuteqarfigisimasanillu allatorluinnaq nassuiaateqarnerat pissutigalugu naatsorsuutigineqarsinnaannginnerat uggornarpoq, taanna oqarpoq.
Uteqattaarinera pakatsissutigigaa
USA-p Kalaallit Nunaannik piginnilerusunnerminik uteqattaarisaqattaarnera Aaja Chemnitzip kalaaliusutut pakatsissutigaa.
- Tamanna uannut nuanninngitsumik misiginarpoq, aammali allat taamatut misigisaqarunarput.
- Suli sapinngisarput tamaat iliuuseqarpugut, akiuuttuartariaqarpugullu tatisiuaannartariaqarlutalu. Kalaallit Nunaat tuniniarneqanngilaq, tuniniarneqanngilluinnarpoq, taanna oqarpoq.
Danmark Donald Trumpip kissaataanut naapertuuttumik Illersornissaqarfiup nukittorsarneqarnissaanik – aamma Issittumi – isumaqatigiissuteqareersimasoq, Aaja Chemnitzip tikkuarpaa.
- Illersornissaqarfiup nukittorsarneqarnissaa tunngavilersuutigineqarpat, soorlu maannamut taamaattoqartoq, maanna allatut oqariartuuteqartoqarnera tupigusuutigineqarsinnaavoq.
- Unneqqarillunga oqassaguma pissutsit atukkavut piviusorsiornerunngitsutut isigaakka, taanna oqarpoq.
/Ritzau/
